Kryeministri Edi Rama ishte i pranishëm në një konferencë në Madrid, para nënshkrimit të marrëveshjes për organizimin e Kongresit Botëror të Ligjit në vitin 2027, që do të mbahet në Tiranë. Teksa foli për këtë kongres i cili do të sjellë rreth 3 mijë juristë nga gjykatat supreme dhe sistemet gjyqësore të shumë vendeve të botës, Rama tha se këto ngjarje do të ishin të paimagjinueshme për Shqipërinë pak vite më parë. Rama shtoi se vitin 2027, Shqipëria do të presë Samitin e NATO-s si dhe finalet europiane nën moshën 21 vjeç.
“Në 2027-ën do të presim një seri evenimentesh, të cilat do të ishin të paimagjinueshme jo 50 vite më parë, por edhe pak vite më parë. Në 2027, Shqipëria nuk do të jetë mikpritëse jo vetëm e Kongresit Botëror të drejtësisë, por edhe e Samitit të NATO-s, po kështu edhe e finaleve Europiane nën moshën 21 vjeç në futboll. Këto janë gjëra të jashtëzakonshme që po ndodhin falë punës që kemi bërë. Duhet të kemi parasysh që nuk ishte 100 vite më parë. Ishim krejtësisht të izoluar dhe ishim Koreja e Veriut e Europës. Pretendonim se ishim vendi i vetëm i vërtet dhe i mirëfilltë komunist. Vitin e kaluar e mbyllëm me 12 milionë vizitorë.
Duhet të luftonim për shumë vite kundër stigmës, që për një farë mënyre na ka ndjekur si hije që kur kemi ardhur në Europë. Një stigmë që na donte të ishim kriminel, hajdutë, rrëmbyes dhe kështu rezultonte që Shqipëria ishte një vend i zymtë dhe askush nuk duhet të shkonte. Por për fat të mirë, e gjithë kjo ka marrë fund. Kushdo që vjen në Shqipëri mirëpritet nga siguria. Kemi normën më të ulët të vjedhje në Eurtopë. Tani kemi pak zënka me britanikët, sepse ata kanë normat më të larta të vjedhjeve, por duhet ta kontrollojnë se ndoshta nuk është e vërtetë. Mikpritja e këtyre ngjarjeve na bën të jemi pjesë e vendeve demokratike. Shpresoj që miku im i dashur dhe një prej udhëheqësve të Europës, Pedro Sanchez, jo vetëm që do të jetë kundër asaj që po them., por kur erdhëm në Granda prisja që të shijoja kuzhinën më të madhe spanjolle. Nuk ishte ushqim i mirë dhe i thashë Pedros se ç’ishte ky katering”-u shpreh Rama.
