Netflix ka ndalur promovimin e aktores transgjinore të nominuar për Oscar, Karla Sofía Gascón gjatë sezonit të çmimeve, pas reagimeve ndaj postimeve nënçmuese që janë rishfaqur. Ylli 52-vjeçar ‘Emilia Pérez’ e njohur si gruaja e parë transgjinore e nominuar për çmimin Oscar për aktoren më të mirë, po përballet me kritika të mëdha pasi një gazetare kanadeze zbuloi postime të vjetra nga llogaria e saj X, sipas The Times.
Në postime, aktorja spanjolle bënte komente islamofobike, kritikonte ceremonitë e kaluara të Oscars dhe referohej George Floyd, i cili u vra nga një oficer policie i bardhë në Minneapolis, si “një i varur nga droga dhe hajdut”. Netflix, distributori i filmit, e ka hequr Gascón nga postimet promovuese dhe planifikon të modifikojë posterat e filmit në mënyrë që yjet e tjerë të kenë më shumë rëndësi ose të shfaqen vetëm, sipas The Hollywood Reporter. Ata gjithashtu nuk do të mbulojnë shpenzimet e ndonjë udhëtimi për Gascon për të promovuar filmin.
Filmi “Emilia Pérez”, e cila tregon historinë e një mbreti karteli meksikan, të luajtur nga Gascón, e cila transformohet në grua, kryeson me 13 nominime për Oscar.
Revista raportoi se Gascón nuk do të fluturonte në Los Anxhelos këtë javë nga shtëpia e saj në Spanjë për serinë e zakonshme të paraqitjeve promovuese dhe fushatës që shënon fillimin e ceremonisë së Oscars, e cila do të mbahet më 2 mars.
Kjo përfshin ceremoni të tjera çmimesh si Critics Choice Awards, Directors Guild Awards dhe Producers Guild Award, të cilat shihen si pararendëse të Oscars dhe në të cilat Emilia Pérez ka marrë gjithashtu një numër nominimesh.
Gascon i tha CNN në fundjavë se ajo nuk do të tërhiqej nga gara për Oscar.
“Jam gjykuar, dënuar, sakrifikuar, kryqëzuar dhe vrarë me gurë pa gjyq dhe pa opsionin për të mbrojtur veten”, tha Gascón në një intervistë emocionale. “Nuk mund të tërhiqem nga një nominim për Oscar sepse nuk kam kryer asnjë krim dhe as kam dëmtuar askënd. Unë nuk jam as racist dhe as diçka që të gjithë këta njerëz janë përpjekur t’i bëjnë të tjerët të besojnë se jam.” Gascón fitoi një çmim të përbashkët për aktoren më të mirë në Festivalin e Filmit në Kanë vitin e kaluar. Regjisori francez Jacques Audiard është kritikuar gjithashtu për përzgjedhjen e shumë pak aktorëve meksikanë në film dhe për përshkrimin e tij shumë të stilizuar të luftërave shkatërruese të karteleve në vend.
