Në një rrjedhje të fundit të mesazheve private nga një grup në aplikacionin Signal, anëtarët kryesorë të administratës së presidentit amerikan Donald Trump kanë shprehur zhgënjimin dhe përçmimin e tyre ndaj përpjekjeve mbrojtëse të Europës.
Zv.presidenti JD Vance dhe sekretari i Mbrojtjes Pete Hegseth kritikojnë në këto komunikime të tyre, aleatët europianë, duke i quajtur ata “të mjerë”, ndërsa SHBA ndihet e detyruar t’i mbështesë ata.
Mesazhet, të dërguara gabimisht te kryeredaktori i revistës The Atlantic, Jeffrey Goldberg, zbuluan pakënaqësi të thellë brenda administratës Trump në lidhje me kontributin e Europës në mbrojtjen globale, veçanërisht në kontekstin e marrëdhënieve SHBA-Ukrainë. Biseda tregoi gjithashtu debate të brendshme mbi veprimet ushtarake të SHBA në Jemen, me shqetësime për konfliktin dhe qëndrimin e ashpër të Trump ndaj Europës.
Goldberg zbuloi se ekipi i sigurisë kombëtare të Trump e shtoi atë në bisedën e tyre në grup, e cila përmban një vëllim të madh informacioni shumë të klasifikuar dhe publikoi detaje të bisedës të hënën.
Biseda duket se ka shërbyer si një dhomë virtuale lufte për disa nga lojtarët kryesorë në Shtëpinë e Bardhë të Trump, duke përfshirë zëvendëspresidentin JD Vance, Sekretarin e Mbrojtjes Pete Hegseth, Sekretarin e Shtetit Marco Rubio, drejtoreshën e Inteligjencës Kombëtare Tulsi Gabbard, këshilltarin e sigurisë kombëtare Mike Waltz dhe shefen e shtabit të Trump, Susie Wiles.
Biseda fillimisht u përqendrua rreth sulmeve ushtarake kundër bastioneve të Houthi-ve në Jemen, të cilat filluan pasi Houthi-t kërcënuan se do të sulmonin përsëri anijet “izraelite” që bllokonin ndihmat të hynin në Rripin e Gazës.
Në biseda, përdoruesi i identifikuar si zv.presidenti JD Vance shpreh shqetësimet për sulmet, por përfundimisht pranon planin e sekretarit të Mbrojtjes të SHBA Pete Hegseth, përpara se të shtojë: “Thjesht e urrej që të shpëtoj Evropën përsëri”.
Hegseth i përgjigjet: “Unë ndaj plotësisht urrejtjen time për sjelljen e butë evropiane. Është PATETIKE.”
Tani Mike Waltz po përballet me shkarkimin nga detyra për shkak të këtij skandali, pasi ai besohet të ketë qenë zyrtari që shtoi gazetarin në grupin në Signal.
Një burim i tha Politico: “Të gjithë në Shtëpinë e Bardhë mund të bien dakord për një gjë: Mike Waltz është idiot.”
Sipas kryeredaktorit të The Atlantic, Goldberg, mesazhet përmbanin informacione që lehtë mund të përdoreshin nga armiqtë e Shteteve të Bashkuara për të dëmtuar personelin dhe pasuritë e tyre.
“Informacioni i përfshirë në to, nëse do të ishte lexuar nga një kundërshtar i Shteteve të Bashkuara, mund të ishte përdorur për të dëmtuar personelin ushtarak dhe inteligjencën amerikane, veçanërisht në Lindjen e Mesme më të gjerë, në zonën e përgjegjësisë së Komandës Qendrore.
Ajo që do të them, për të ilustruar pamaturinë tronditëse të kësaj bisede në “Signal”, është se mesazhet e Hegseth përmbanin detaje operacionale të sulmeve të ardhshme në Jemen, duke përfshirë informacione rreth objektivave, armëve që SHBA do të përdorte dhe renditjes së sulmeve”, tha Goldber.
Bisedat u konfirmuan si legjitime nga qeveria amerikane, por një zëdhënës i Shtëpisë së Bardhë tha se ishte një “demonstrim i koordinimit të thellë dhe të menduar politik midis zyrtarëve të lartë”.
I pyetur për mesazhet që rrodhën nga ky grup, presidenti i SHBA Donald Trump u tha të hënën gazetarëve në Shtëpinë e Bardhë se nuk e kishte parë historinë e The Atlantic. Duke parë i habitur, Trump tha: “Nuk di asgjë për këtë. Unë nuk jam një fans i madh i The Atlantic. Për mua është një revistë që po dështon.”
Ish-kandidatja presidenciale e Partisë Demokratike dhe kundërshtarja afatgjatë e Trump, Hillary Clinton iu përgjigj lajmeve për mesazhet e zbuluara me një postim në ‘X’, duke shkruar: “A po talleni?”
