Bursa e Nju Jorkut u hap me rënie edhe sot, teksa investitorët shfaqeshin të shqetësuar për hakmarrjen e vendosur nga Kina ndaj breshërisë së tarifave nga presidenti amerikan Donald Trump.
Që nga ora 17:10, mesatarja industriale Dow Jones ra me 2.75%, indeksi i teknologjisë Nasdaq u ul me 3.49% dhe S&P 500 ra me 3.31%. Sesioni i djeshëm ishte më i keqi për Nasdaq që nga marsi 2020. S&P 500 shënoi rënien e tij më të madhe që nga qershori 2020.
Rënia e sotme është për faktin se “shqetësimet vazhdojnë për tarifat e shpallura nga Trump” por edhe “për përgjigjen e Kinës, e cila erdhi më shpejt se sa pritej”, komentoi analisti Sam Stovall, i CFRA. Indeksi kryesor i Bursës së Parisit, CAC 40, ra të premten dhe fshiu të gjitha fitimet e tij që nga 1 janari , i goditur nga përshkallëzimi i tensioneve tregtare midis SHBA-së dhe Kinës.
Tarifat e Trump dhe Kina
Tarifat e reja të shpallura nga Trump të mërkurën janë veçanërisht të dëmshme për Kinën pasi ato i shtojnë 34% të tjera tarifave 20% tashmë të vendosura për mallrat e importuara kineze. Pekini u përgjigj shpejt se do të vendoste tarifa shtesë prej 34% për mallrat amerikane nga 10 prilli, në krye të asaj që ka qenë në fuqi deri më sot.
Trump pretendoi se Pekini ishte “i zënë nga paniku” nga tarifat.
Aksionet e kompanive kineze të listuara në bursën e Nju Jorkut ranë ndjeshëm sot pasi lufta tregtare u përshkallëzua, ku Alibaba pati rënie me 9.56% dhe rivalët e tregtisë elektronike PDD (pronar i Temu) me 7.55% dhe JD.com me 8.35%. Gjashtë nga “Magnificent Seven”, gjigantët e teknologjisë, panë gjithashtu rënie të aksioneve të tyre: Tesla (-6,54%), Alphabet (-0,20%), Amazon (-1,98%), Meta (-3,03%), Apple (-2,86%) dhe Nvidia (-4,22%). Vetëm Microsoft kalon në “të gjelbër” (+0.31%).
Në sektorin e veshjeve, kompanitë që prodhojnë produkte në Kinë, Vietnam apo Kamboxhia vazhdojnë prirjen e tyre rënëse, ndonëse në një masë më të vogël krahasuar me ditën e djeshme, si Gap (-3,22%), Ralph Lauren (-4,93%), Lululemon (-5,03%) dhe gjiganti amerikan Nike (-3,12%).
Zhytet edhe në bursat europiane
Të gjitha bursat evropiane shënuan rënie të madhe, pas njoftimit të Kinës për vendosjen e tarifave ndaj produkteve amerikane. Rreth orës 14:30, Bursa e Frankfurtit ra me 5,61%, Londra 4,24%, Cyrihu 5,57%, Milano 7,74% dhe Madridi 6,29%. Kompanitë e ndërtimit dhe të lëndëve të para janë nën presion të madh, me aksionet e ArcelorMittal në rënie me 10.66% në Paris. Në Londër, Glencore ra me 9.53% dhe në Frankfurt industrial Thyssenkrupp ra me 10.39%.
Bankat gjithashtu regjistruan një rënie të madhe: në Paris, aksioni i Société Générale ra me 12.26%, BNP Paribas me 8.40%. Në Frankfurt, Deutsche Bank ra me 10.82% dhe në Londër Barclays me 10.10%.
Edhe çmimi i naftës po bie. Më parë, Brent i Detit të Veriut tregtohej me 65,38 dollarë për fuçi (-6,78%) dhe WTI amerikan me 62,07 dollarë për fuçi (-7,29%).
