Kremlini do të njoftojë së shpejti raundin e ardhshëm të bisedimeve të drejtpërdrejta midis Rusisë dhe Ukrainës, u tha ministri i jashtëm rus Sergei Lavrov udhëheqësve të mbledhur në një samit sigurie në Moskë.
Ai tha gjithashtu se Moska do të këmbëngulë që Kievi të shfuqizojë të gjitha “ligjet diskriminuese” në Ukrainë në raundin e ri të negociatave të drejtpërdrejta.
“Në këto negociata më 16 maj në Stamboll, kur ato rifilluan, ne këmbëngulëm në heqjen e të gjitha ligjeve diskriminuese dhe do të vazhdojmë ta bëjmë këtë në raundin tjetër të negociatave të drejtpërdrejta, të cilat do t’i shpallim në një të ardhme shumë të afërt.
Dua të theksoj se ne gjithmonë, për shumë vite, para operacionit ushtarak special dhe pas fillimit të tij, i kemi propozuar dhe vazhdojmë t’i propozojmë palës ukrainase zgjidhjen e të gjitha problemeve, të cilat po bëhen gjithnjë e më serioze çdo vit, përmes dialogut dhe diplomacisë.“, tha Lavrov.
Negociatat në Stamboll, ishin bisedimet e para të drejtpërdrejta midis Rusisë dhe Ukrainës në më shumë se tre vjet, theksoi ai. Bisedimet dështuan të arrinin qëllimin e Ukrainës për një armëpushim të plotë dhe pa kushte, por të dyja palët ranë dakord të shkëmbenin nga 1,000 të burgosur lufte secila në shkëmbimin më të madh të konfliktit.
