Shefi i Ndihmave Humanitare të OKB-së ka deklaruar për BBC se 14,000 foshnja mund të vdesin në Gaza brenda 48 orëve nëse nuk arrin ndihma. Tom Fletcher, nënpresidenti i përgjithshëm i OKB-së për çështjet humanitare, ka folur për programin “Today” për situatën emergjente në Gaza.
“Dua të shpëtojmë sa më shumë nga këto 14,000 foshnja që mundemi në 48 orët e ardhshme,” thotë ai. Ai thekson se “duhet të mbushim Rripin e Gazës me ndihma humanitare.” “Do të jetë e vështirë, do të kemi pengesa dhe do të rrezikojmë shumë. Por nuk shoh një ide më të mirë sesa të dërgojmë ushqim për foshnjat,” shton ai.
Përsa i përket mënyrës se si OKB-ja ka arritur në përllogaritjen se 14,000 foshnja mund të vdesin brenda 48 orëve nëse nuk mbërrijnë ndihmat, Fletcher shpjegon se “kemi ekipe të forta në terren – dhe natyrisht shumë prej tyre janë vrarë.”
Presioni ndërkombëtar e detyroi Benjamin Netanyahun të njoftonte të dielën në mbrëmje se do të lehtësonte bllokadën shkatërruese 11-javore të ndihmës për të parandaluar një “krizë urie” në Gaza – por vetëm në një nivel minimal.
