Më shumë se 50 palestinezë janë raportuar të vrarë pas një sulmi ajror izraelit që goditi një ndërtesë banimi në veri të Gazës, njoftoi Ministria e Shëndetësisë.
Ndërkohë, autoritetet shëndetësore në Gaza deklaruan se 29 fëmijë dhe të moshuar kanë ndërruar jetë gjatë ditëve të fundit për shkak të urisë, duke i regjistruar si “vdekje të lidhura me urinë”, ndërsa mijëra të tjerë rrezikojnë të vdesin nga mungesa e ushqimit.
Izraeli ka intensifikuar gjithashtu sulmet në Libanin jugor dhe lindor, duke goditur disa qytete dhe duke vrarë të paktën një person. Sulmet janë përshkruar si ndër më të rëndat që nga arritja e një armëpushimi me Hezbollah-un në nëntor të vitit të kaluar.
Sipas të dhënave të fundit nga Ministria e Shëndetësisë në Gaza, që prej fillimit të luftës, Izraeli ka vrarë të paktën 53,762 palestinezë dhe ka plagosur 122,197 të tjerë. Zyrat Qeveritare të Medias në Gaza kanë përditësuar numrin total të viktimave në mbi 61,700, duke theksuar se mijëra persona të zhdukur nën rrënoja konsiderohen të vdekur.
