Departamenti i Shtetit i Shteteve të Bashkuara ka rifilluar intervistat për aplikantët e rinj të vizave studentore, duke vendosur një seri rregullash më të rrepta që prekin në mënyrë të veçantë praninë e tyre në rrjetet sociale. Sipas një komunikate zyrtare të siguruar nga The Washington Post dhe dërguar ambasadave amerikane këtë të mërkurë, të gjithë aplikantëve do t’u kërkohet që profilet e tyre në platformat sociale të jenë të hapura për publikun, për të lejuar autoritetet të verifikojnë qëndrimet e tyre ndaj SHBA-së dhe çdo përmbajtje që mund të konsiderohet armiqësore.
Ky vendim vjen pas një pezullimi të përkohshëm të intervistave për viza studentore muajin e kaluar, si pjesë e një fushate më të gjerë nga zyrtarët amerikanë, që kanë shprehur shqetësime për përhapjen e antisemitizmit në disa universitete dhe për rreziqet e mundshme për sigurinë kombëtare.
Masat e reja të verifikimit do të zbatohen për të gjithë aplikantët e vizave F, M dhe J – përkatësisht për studime akademike, arsim profesional dhe shkëmbime kulturore – pa marrë parasysh institucionin ku synojnë të studiojnë. Sipas autoriteteve, kjo qasje e re synon të garantojë që vetëm personat që respektojnë vlerat dhe parimet amerikane të lejohen të hyjnë në vend për arsye studimore.
