Ministri i Investimeve i Arabisë Saudite, Khalid bin Abdulaziz al-Falih, mbërriti në Damask të hënën, i shoqëruar nga një delegacion i madh prej 130 biznesmenësh, me qëllim nënshkrimin e marrëveshjeve të investimit me vlerë 4 miliardë dollarë.
Ky veprim është pjesë e përpjekjeve të Riadit për të mbështetur rindërtimin e Sirisë pas një lufte civile shkatërruese 14-vjeçare.
Mbretëria saudite është bërë një aleat kyç i qeverisë së re kalimtare nën presidentin, Ahmed al-Sharaa, i cili erdhi në pushtet dhjetorin e kaluar pas përmbysjes së Bashar al-Assad. Al-Sharaa e ka bërë rindërtimin e vendit një përparësi dhe vizita e ministrit saudit shënon një hap vendimtar në këtë drejtim.
Rimëkëmbja industriale me fabrikën e parë të çimentos.
Gjatë qëndrimit të tij në Siri, Al-Falih përuroi së bashku me homologun e tij sirian një strukturë të re prodhimi çimentoje në Andra, në periferi të Damaskut. Fabrika, e cila do të prodhojë çimento të bardhë, është e para e këtij lloji në vend dhe është pjesë e një plani më të gjerë për të rinisur aktivitetin industrial.
Ministri saudit do të marrë pjesë gjithashtu në një konferencë dy-ditore investimi që fillon sot në kryeqytetin sirian. Pavarësisht përplasjeve të fundit sektare në Sweida, të cilat kanë marrë qindra jetë, qeveria vazhdon të promovojë Sirinë si një destinacion investimi. Sektorët që tërheqin interesin saudit përfshijnë energjinë, industrinë hoteliere dhe infrastrukturën e aeroportit.
Sipas një biznesmeni sirian të përfshirë në proces, të dy vendet po planifikojnë të krijojnë një këshill të përbashkët biznesi. Në të njëjtën kohë, bizneset nga vendet e tjera të Gjirit, si dhe Turqia, thuhet se kanë shprehur interes në restaurimin e objekteve energjetike, rrugëve, porteve dhe infrastrukturës tjetër bazë të shkatërruar në luftë.
Damasku tashmë ka nënshkruar një marrëveshje prej 7 miliardë dollarësh me Katarin për të prodhuar energji elektrike, ndërsa kompania portuale DP World me seli në Emiratet e Bashkuara Arabe ka investuar 800 milionë dollarë në projekte portuale.
Përveç kësaj, kompanitë amerikane të energjisë pritet të paraqesin një plan gjithëpërfshirës për sektorin e energjisë siriane. Heqja e sanksioneve të SHBA-së kundër Sirisë, e iniciuar nga Princi i Kurorës Mohammed bin Salman, i cili arriti të sigurojë pëlqimin e Presidentit Donald Trump, ka luajtur një rol të rëndësishëm në këto zhvillime.
Arabia Saudite dhe Katari gjithashtu vazhduan të shlyejnë borxhet e Sirisë ndaj Bankës Botërore, një veprim që konsiderohet si katalizator për riintegrimin e vendit në sistemin financiar ndërkombëtar dhe aftësinë për të aksesuar kredi të reja.
Në shkurt, Ahmed al-Sharaa bëri vizitën e tij të parë zyrtare jashtë vendit si president i Sirisë, duke zgjedhur Arabinë Saudite si destinacionin e tij. Kjo vizitë ishte pika fillestare për forcimin e marrëdhënieve dypalëshe dhe hodhi themelet për vrullin e investimeve të sotme.
