Një ngjarje e pazakontë dhe e rrezikshme është zbardhur nga Policia e Tiranës, pas djegies së qëllimshme të një automjeti në rrugën “Demir Zyko”. Falë operacionit të koduar “Blaze”, organizuar nga Komisariati i Policisë Nr. 4, është bërë i mundur identifikimi dhe arrestimi i autorit të dyshuar, një 60-vjeçar që dyshohet se i vuri flakën makinës së fqinjit të tij, pas një konflikti për motive të dobëta.
Sipas njoftimit zyrtar të Policisë, gjithçka ndodhi më 6 korrik 2025, kur shërbimet policore morën njoftim për një automjet të përfshirë nga flakët në këtë zonë të kryeqytetit. Pas hetimeve të shpejta dhe sigurimit të pamjeve filmike, hetuesit arritën të dokumentojnë momentet kur autori afrohet me lëndë djegëse dhe më pas i vë flakën automjetit.
Në pranga ka rënë shtetasi S. Gj., 60 vjeç, banues në të njëjtën rrugë ku ndodhi ngjarja. Ai akuzohet se ka djegur makinën e fqinjit të tij, shtetasit R. M., për arsye që policia i klasifikon si “motive të dobëta”.
Materialet për këtë ngjarje i janë kaluar Prokurorisë së Tiranës për veprime të mëtejshme, ndërsa hetimet po vijojnë për të zbardhur të plotë rrethanat.
Policia nuk ka bërë publike ende pamjet filmike që çuan në arrestimin e autorit, por burime nga grupi hetimor bëjnë me dije se ato kanë qenë vendimtare për identifikimin dhe dokumentimin e ngjarjes.
