OKB-ja ka paralajmëruar për “pasoja katastrofike” nëse Izraeli zgjeron operacionet e tij ushtarake në Rripin e Gazës, pas raporteve se kryeministri Benjamin Netanyahu mund të propozojë ripushtimin e plotë të territorit.
Ushtria izraelite ka bërë të ditur se aktualisht kontrollon rreth 75% të Gazës, një territor ku ndodhet shumica e popullsisë tërësisht të zhvendosur prej 2.1 milionë banorësh. Këto zona janë kryesisht në veri dhe jug të Gazës.
Nëse Izraeli vendos të vazhdojë me një pushtim të plotë ushtarak, kjo do të kërkonte dërgimin e dhjetëra mijëra trupave të tjera për të marrë kontrollin e pjesës tjetër të Gazës, përfshirë brezin bregdetar, rajonin qendror dhe kryeqytetin, qytetin e Gazës, shkruan BBC.
Një nga zonat më të ndjeshme është al-Mawasin, që ka statusin e një “zone të sigurt” civile të përcaktuar nga Izraeli, ku deri në gjysmë milioni palestinezë strehohen në kushte të mbipopulluara dhe të vështira. Shtimi i operacioneve ushtarake në këto zona do të çrrënjosë në mënyrë të pashmangshme një numër shumë të madh palestinezësh nga shtëpitë e tyre, duke shtuar më tej krizën humanitare.
Po ashtu, veprimet e mundshme të forcave izraelite drejt fortesave të mbetura të Hamasit dhe zonave ku besohet se mbahen pengje mund të rrisin ndjeshëm mundësinë që këta pengje të vriten nga pengmarrësit e tyre. Gjatë gushtit të vitit të kaluar, gjashtë pengje u gjetën të vrarë, të cilët besohet se ishin qëlluar pak para se ushtria izraelite të arrinte në vendndodhjen e tyre.
Nga ana tjetër, OKB-ja ka theksuar se Gaza ka qenë nën një formë të pushtimit izraelit edhe para operacioneve të fundit ushtarake, që pasuan sulmin e Hamasit ndaj Izraelit më 7 tetor 2023. Pushtimi, i cili filloi në vitin 1967, nuk ka përfunduar as kur Izraeli tërhoqi të gjitha trupat dhe kolonët nga territori në vitin 2005, sepse ka ruajtur kontrollin mbi hapësirën ajrore, ujërat bregdetare dhe kufirin e përbashkët të Gazës.
Në këtë kontekst, një zgjerim i operacioneve do të mund të ketë pasoja të rënda jo vetëm për banorët e Gazës, por edhe për stabilitetin e gjithë rajonit.
