Rusia nisi ditën e djeshme, 28 gusht, një ofensivë ajrore të përmasave të mëdha ndaj Ukrainës, duke sfiduar paralajmërimet ndërkombëtare dhe negociatat e hapura me Shtetet e Bashkuara. Presidenti rus Vladimir Putin urdhëroinjë sulm të koordinuar dhe brutal, që ka goditur jo vetëm Kievin, por edhe objektiva të tjerë civilë e ushtarakë në disa rajone të vendit.
Sulmi mbi kryeqytetin ukrainas u shënua si një nga episodet më të përgjakshme të kësaj fushate. Një seri shpërthimesh me raketa dhe dronë goditën ndërtesa banimi dhe infrastrukturë civile, duke lënë pas dhjetëra viktima dhe një mesazh të qartë për qeverinë e Volodymyr Zelensky dhe aleatët e saj perëndimorë: një përshkallëzim i mëtejshëm është real.
Operacioni rus vjen si kundërpërgjigje ndaj sulmeve të fundit të Ukrainës mbi rafineritë e naftës në territorin rus sulme që kanë prekur rëndë furnizimin me karburant dhe kanë nxitur reagimin e ashpër të Kremlinit.
Në mesin e objektivave të goditura ishte edhe një ndërtesë në Kiev ku ndodhen zyrat e delegacionit të Bashkimit Evropian dhe selia e British Council. Po ashtu, një operacion i veçantë është zhvilluar në deltën e Danubit, pranë kufirit me Rumaninë, pra, buzë territorit të BE-së. Një dron detar rus ka depërtuar dhjetëra kilometra në lumenj dhe ka goditur anijen “Simferopol”, një nga të paktat njësi të mbetura të marinës ukrainase, e specializuar në zbulim elektronik dhe e përdorur në operacione kundër porteve në Krime.
Një tjetër objektiv me peshë simbolike ishte edhe fabrika e kompanisë turke Bayraktar, e cila ndodhet në periferi të Kievit. Edhe pse ende e painauguruar, ajo u godit nga dy raketa hipersonike ruse Kinzhal, që kaluan sistemin mbrojtës amerikan Patriot. Goditja shkaktoi një zjarr të madh që vazhdoi për orë të tëra dhe që u pa në pjesën më të madhe të kryeqytetit.
Kremlini, me këtë sulm, ka dhënë një sinjal të fortë për kompanitë e huaja që mbështesin industrinë ushtarake të Ukrainës, përfshirë ato që ndihmojnë ndërtimin e asaj që presidentja e Komisionit Evropian Ursula von der Leyen e ka quajtur “Iriqi prej çeliku”, mbrojtja e re ukrainase kundër pushtimit rus.
Ndërkohë, edhe depoja e lokomotivave dhe trenave në Ukrainë u godit, në një përpjekje për të ndëshkuar sulmet e fundit ukrainase mbi linjat hekurudhore në territoret e pushtuara nga Rusia, një taktikë që Kievi ka nisur ta përdorë për të penguar përgatitjet e një ofensive të re tokësore ruse.
Pesë mesazhet e “koduara” të Putin:
Demoralizimi i popullsisë civile – Sulmet mbi Kievin, që goditën ndërtesa banimi dhe krijuan skena paniku mes civilëve, synojnë të minojnë moralin e një populli të lodhur nga mbi 40 muaj luftë.
Sfida ndaj Perëndimit – Me një raketë që shkatërroi godinën ku ndodhen zyra të BE-së dhe British Council, dhe me një sulm brenda deltës së Danubit pranë kufirit rumun, Rusia ka dërguar një paralajmërim të drejtpërdrejtë drejt Bashkimit Evropian dhe NATO-s.
Ndëshkim për mbështetjen ushtarake – Goditja e fabrikës së dronëve turq Bayraktar në periferi të Kievit, si dhe e një filiali të një kompanie amerikane javën e kaluar, janë sinjale për kompanitë e huaja që ndihmojnë Ukrainën në fushën e mbrojtjes.
Paralajmërim për hekurudhat dhe logjistikën – Sulmet ndaj depozitimeve hekurudhore kanë për qëllim të ndalojnë përpjekjet e Ukrainës për të goditur linjat logjistike ruse dhe për të përgatitur një kundërofensivë.
Demonstrim i fuqisë së arsenalit rus – Përdorimi i raketave hipersonike, dronëve kamikazë dhe sulmeve të koordinuara tregon se Rusia ka kapacitete të mjaftueshme për të përsëritur sulme të tilla me intensitet të lartë në të ardhmen e afërt.
