Marash Kumbulla ka pësuar një dëmtim të rëndë gjatë ndeshjes që ekipi i tij, Mallorca, luante kundër Atlético Madrid në La Liga. Mbrojtësi i Kombëtares shqiptare u detyrua të braktisë fushën në minutën e 36-të të takimit, duke ngritur shqetësime për gjendjen e tij fizike dhe për efektet që ky dëmtim mund të ketë për të ardhmen e tij.
Dëmtimi vjen në një periudhë shumë delikate për Kumbullën, pasi ai ishte një nga lojtarët që do i duheshin Sylvinhos për ndeshjen vendimtare të Kombëtares shqiptare ndaj Serbisë në kuadër të kualifikuesve të Botërorit 2026.
Ky takim është një mundësi e artë për Shqipërinë për të ruajtur shpresat e saj për kualifikim dhe, pa dyshim, humbja e një lojtari të tillë si Kumbulla, mund të ndikojë negativisht në planet e trajnerit.
25-vjeçari, i cili ishte huazuar nga Roma te Mallorca, po kalonte një periudhë shumë të mirë në Spanjë. Pas një sezoni të suksesshëm me Espanyol, ku pati paraqitje mbresëlënëse, Kumbulla fitoi menjëherë vendin si titullar në skuadrën e Mallorca-s.
Deri më tani, detajet e dëmtimit nuk janë bërë të qarta, dhe ekspertët do të bëjnë testet e nevojshme për të përcaktuar shkallën e dëmtimit. Me shumë mundësi, Kumbulla do t’i nënshtrohet më shumë ekzaminimeve për të konfirmuar se sa serioze është situata dhe kur mund të kthehet në fushë.
