Ministrja për Evropën dhe Punët e Jashtme, Elisa Spiropali, vuri në dukje rëndësinë strategjike që diplomacia ekonomike zë në agjendën e Shqipërisë për vitet në vijim, duke e cilësuar atë si një nga prioritetet kryesore në kuadër të vizionit “Shqipëria 2030”.
Në një takim me nëpunësit e shërbimit të jashtëm, të cilët po marrin pjesë në trajnimin për Diplomacinë Ekonomike, Spiropali theksoi se përgatitja profesionale dhe praktike e kësaj trupe është thelbësore për promovimin e profilit ekonomik të vendit. Në takim ishte i pranishëm edhe Ambasadori i Mbretërisë së Holandës në Shqipëri, z. Reinout Caspar Vos.
“Diplomacia ekonomike, prioritet për Shqipërinë 2030.
Me hyrjen në zyrë mëngjesin e sotëm, përshëndeta nëpunësit e shërbimit të jashtëm të Shqipërisë, që po marrin pjesë në trajnimin e Diplomacisë Ekonomike, me praninë e Ambasadorit të Mbretërisë së Holandës në Shqipëri, z. Reinout Caspar Vos.
Përgatitja e trupës së shërbimit të jashtëm me aftësitë praktike në promovimin e profilit ekonomik të vendit është pjesë e vizionit për forcimin e rrjetit të atasheve ekonomikë dhe ndërtimin e një platforme unike për investitorët e huaj në vend”, shprehet ajo.
