Presidenti i Salvadorit, Nayib Bukele, njoftoi të enjten se po ndalon “gjuhën gjithëpërfshirëse” në shkollat publike të vendit, si pjesë e rregullave të reja disiplinore të rrepta për institucionet arsimore. Bukele, një aleat i Donald Trump, ka miratuar një politikë konservatore, megjithëse para se të vinte në pushtet tha se mbështeste kërkesat e komunitetit LGBTQ+.
“Që nga sot, gjuha e quajtur gabimisht ‘gjithëpërfshirëse’ është e ndaluar në të gjitha institucionet publike të arsimit në vendin tonë”, tha ai në X.
Ndalimi synon të promovojë “përdorimin e mirë” të gjuhës dhe “të shmangë përzierjen e ideologjive ose globalizimin që mund të dëmtojë zhvillimin e nxënësve”, tha ministrja e Arsimit, Carla Triggeros.
Ndalimi vlen edhe për të gjitha shërbimet e Ministrisë së Arsimit, siç janë librat dhe përmbajtja mësimore.
Nxënësit e shkollave publike tashmë duhet të respektojnë rregulla të rrepta për veshjen dhe modelin e flokëve, të cilat sindikata e mësuesve Frente Magisterial Salvadoreño i ka përshkruar si një “militarizim” të sistemit shkollor.
Vitin e kaluar, Bukele pushoi nga puna 300 punonjës të Ministrisë së Kulturës për shkak se mbronin çështje të papajtueshme me vizionin e qeverisë së tij për “familjen tradicionale”, “besimin” dhe “jetën”, sipas ligjvënësve të partisë në pushtet.
Presidenti salvadorian, i cili ka qenë në pushtet që nga viti 2019, është popullor për luftën e tij kundër bandave.
Por grupet e të drejtave të njeriut kanë denoncuar shkeljet dhe thonë se mijëra njerëz të pafajshëm janë në burg.
