Presidenti i Ukrainës, Volodymyr Zelenskyy, njoftoi se zhvilloi për të dytën ditë radhazi një bisedë telefonike me presidentin amerikan Donald Trump, të cilën e përshkroi si “shumë produktive”.
Sipas tij, biseda u përqendrua në çështje kyçe si mbrojtja, përdorimi i armëve me rreze të gjatë veprimi, përfshirë raketat Tomahawk dhe nevojat energjetike të Ukrainës.
Zelenskyy i kërkoi Trumpit të luajë një rol ndërmjetësues për paqen në Ukrainë, njësoj siç janë bërë përpjekje për paqen në Lindjen e Mesme. Ai theksoi se Rusia po përfiton nga vëmendja globale ndaj konfliktit në atë rajon, duke intensifikuar sulmet kundër Ukrainës.
Ndërkohë, Rusia vazhdon ofensivën ajrore ndaj infrastrukturës kritike energjetike të vendit. Gjatë natës, forcat ruse lëshuan 118 dronë, duke shkaktuar shtatë viktima dhe plagosjen e të paktën 23 personave në disa rajone, përfshirë Odesën, Donetskun dhe Çernihivin. Dëmtime u raportuan edhe në rrjetin energjetik të kryeqytetit, Kiev, ku u plagosën dy punonjës të kompanisë energjetike DTEK.
Zelenskyy paralajmëroi se Rusia synon të godasë sektorin energjetik përpara dimrit, duke e quajtur këtë një formë terrori ajror. Vetëm gjatë javës së fundit, Ukraina është përballur me mbi 3,100 dronë, 92 raketa dhe rreth 1,360 bomba të lëshuara nga Rusia. Ai kërkoi që sanksionet ndaj Moskës, tarifat dhe veprimet ndaj vendeve që blejnë naftë ruse të vazhdojnë, për të mos i dhënë Rusisë mundësinë të përshkallëzojë agresionin.
