Izraeli ka konfirmuar se trupi i fundit i një pengu të kthyer nga Hamasi nëpërmjet Kryqit të Kuq, është ai i ushtarit izraelito-amerikan Itay Chen. Eshtrat e 19-vjeçarit u dorëzuan të martën si pjesë e një marrëveshjeje armëpushimi në Gaza të ndërmjetësuar nga presidenti i SHBA-së, Donald Trump muajin e kaluar.
“Pas përfundimit të procesit të identifikimit, përfaqësuesit e [Forcave të Mbrojtjes së Izraelit] informuan familjen e pengut të rënë, rreshterit të stafit Itay Chen, se i dashuri i tyre është kthyer në Izrael dhe është identifikuar”, tha zyra e kryeministrit izraelit.
Më parë, krahu ushtarak i Hamasit tha se kishte gjetur trupin e një ushtari izraelit në lagjen lindore Shejaiya të qytetit të Gazës, transmeton Telegrafi.
Izraeli kishte lejuar anëtarët e grupit të armatosur palestinez dhe stafin e Kryqit të Kuq të kërkonin eshtrat në zonë, e cila është brenda territorit që ende kontrollohet nga forcat izraelite. Rreshteri Chen shërbente si ushtar në Brigadën e 7-të të IDF-së kur persona të armatosur të udhëhequr nga Hamasi sulmuan Izraelin jugor më 7 tetor 2023.
