Dhjetëra mijëra njerëz u mblodhën të dielën në Madrid në një protestë të madhe antiqeveritare, duke kërkuar zgjedhje të parakohshme, ndërsa kryeministri socialist Pedro Sánchez përballet me një valë akuzash për korrupsion që prekin familjarë, figura të partisë dhe anëtarë të administratës së tij.
Tubimi, i thirrur nga Partia Popullore (PP) me sloganin “Kaq është: mafia apo demokraci?”, u zhvillua tre ditë pasi ish-ministri i transportit, José Luis Ábalos – dikur një nga aleatët më të ngushtë të Sánchez – u dërgua në paraburgim nga gjykata si pjesë e hetimeve për një skemë të dyshuar rryshfetesh në këmbim të kontratave publike.
Sipas PP-së, në protestë morën pjesë rreth 80 mijë persona, ndërsa autoritetet qeveritare në Madrid vlerësuan se numri ishte afërsisht përgjysmë.
Kreu i PP-së, Alberto Núñez Feijóo, e quajti legjislaturën aktuale “absurde” dhe argumentoi se vendi nuk mund të vazhdojë nën një klimë të tillë politike. Ai tha se paraburgimi i Ábalosit ishte prova e degradimit të modelit politik të kryeministrit – sanchismo – të cilin e akuzoi për “korrupsion politik, ekonomik, institucional, social dhe moral”.
Presidentja e rajonit të Madridit, Isabel Díaz Ayuso, e njohur për retorikën e saj të ashpër, e çoi kritikën edhe më tej, duke akuzuar Sánchez se po i jep mbështetje forcave nacionaliste baskë. Ajo madje riktheu në diskurs edhe Etën, megjithëse organizata terroriste u shpërbë përfundimisht në vitin 2018.
Ndërkohë, ministri spanjoll i Presidencës dhe Drejtësisë, Félix Bolaños, u kundërpërgjigj duke thënë se PP dhe e djathta ekstreme Vox – e cila nuk mori pjesë në protestë – “janë thelbësisht e njëjta gjë” dhe po konkurrojnë se kush mund të thotë akuzat më të rënda ndaj kryeministrit.
Pedro Sánchez, që erdhi në pushtet në vitin 2018 pas rrëzimit të një qeverie të zhytur në skandale, ka premtuar se do të vazhdojë punën pavarësisht hetimeve të shumta që përfshijnë bashkëshorten dhe vëllain e tij, si dhe zyrtarë të lartë të partisë socialiste.
Kriza politike u thellua të hënën, kur Prokurori i Përgjithshëm, Álvaro García Ortiz, dha dorëheqjen pas një vendimi të Gjykatës së Lartë që e shpalli fajtor për publikimin e të dhënave të ndjeshme lidhur me hetimet tatimore ndaj partnerit të Ayusos.
Ndërkohë vijojnë hetimet për një seri akuzash të tjera, përfshirë dyshimet për përfitime të paligjshme në kontrata publike gjatë pandemisë së Covid-19. Santos Cerdán, Ábalos dhe ish-këshilltari Koldo García i kanë mohuar akuzat dhe këmbëngulin në pafajësinë e tyre.
