Sekretari i ri i Përgjithshëm i NATO-s, Mark Rutte, ka deklaruar se pranimi i çdo anëtari të ri në Aleancë kërkon miratimin unanim të vendeve anëtare. Duke iu referuar kërkesës së Ukrainës për t’u anëtarësuar, ai tha se jo të gjitha shtetet anëtare janë aktualisht në një mendje.
“Sipas rregullave të NATO-s, për një aleat të ri nevojitet unanimitet. Të gjithë anëtarët duhet të bien dakord, dhe disa aleatë janë kundër anëtarësimit të Ukrainës”, u shpreh shefi i aleancës më të fuqishme ushtarake.
Deklarata vjen në një moment kur Ukraina vazhdon të kërkojë mbështetje më të madhe politike dhe ushtarake nga Aleanca, ndërsa procesi i anëtarësimit mbetet i bllokuar për shkak të mungesës së konsensusit.
Rutte theksoi se dialogu mes aleatëve do të vazhdojë, por vendimmarrja kërkon pajtim të plotë mes 32 vendeve anëtare. Ndryshe, SHBA-ja është një ndër vendet kryesore që kundërshton anëtarësimin e shtetit ukrainas në NATO.
