Shtetet e Bashkuara duket se janë të gatshme të njohin kontrollin rus të Krimesë dhe territoreve të tjera të pushtuara ukrainase në mënyrë që të sigurojnë një marrëveshje për t’i dhënë fund luftës.
Sipas Telegraph, Donald Trump do të dërgojë të dërguarin special Steve Witkoff dhe dhëndrin e tij, Jared Kushner, për t’ia paraqitur ofertën Vladimir Putinit në Moskë.
Propozimi për të njohur sovranitetin e Rusisë pritet të ecë përpara pavarësisht shqetësimeve nga aleatët europianë të Ukrainës. Sipas një burimi të njohur me negociatat, “po bëhet gjithnjë e më e qartë se amerikanët nuk janë të interesuar për pozicionin e europianëve. Ata thonë se europianët mund të bëjnë çfarë të duan”.
Presidenti rus tha të enjten se njohja ligjore e Krimesë dhe rajoneve të Donetskut dhe Luhanskut nga SHBA-ja si territor rus do të ishte një nga çështjet kryesore në negociatat mbi planin e paqes të presidentit amerikan.
Të premten, Kremlini njoftoi se kishte marrë një strategji të rishikuar për t’i dhënë fund luftës, të hartuar pas bisedimeve emergjente midis zyrtarëve ukrainas dhe amerikanë në Gjenevë javën e kaluar.
Plani origjinal i paqes me 28 pika, të cilin Witkoff e kishte hartuar pas diskutimeve me zyrtarët rusë, përfshinte njohjen “de facto” të Krimesë dhe dy rajoneve lindore të Donbasit nga SHBA-ja. Strategjia gjithashtu propozonte njohjen “de facto” të territoreve të mbajtura nga Rusia pas vijës së kontaktit në rajonet Kherson dhe Zaporizhia të Ukrainës, pas çdo marrëveshjeje armëpushimi.
Në Gjenevë, zyrtarët ukrainas dhe amerikanë negociuan një plan të ri me 19 pika që është më pak i favorshëm për Moskën. Megjithatë, burime të shumta thonë se ofertat amerikane të njohjes mbeten pjesë e strategjisë.
Ukraina nuk do të detyrohet të njohë kontrollin rus mbi territoret që ka aneksuar në mënyrë të paligjshme që nga viti 2014. Kushtetuta ukrainase ndalon çdo president ose qeveri të lëshojë territor pa e vënë më parë çështjen para popullit në një referendum mbarëkombëtar.
Shefi i stafit të presidentit ukrainas, Andriy Yermak, dhe këshilltari i sigurisë kombëtare i Zelensky-t, Rustam Umerov, pritej të udhëtonin për në Florida për t’u takuar me zyrtarë amerikanë në resortin Mar-a-Lago të Trump këtë fundjavë.
Në një intervistë të re me revistën The Atlantic, Yermak, i cili negocioi planin e fundit të paqes, tha: “Asnjë person i shëndoshë mendërisht sot nuk do të nënshkruante një dokument për të hequr dorë nga territori. Për sa kohë që Zelensky është president, askush nuk duhet të presë që ne të heqim dorë nga territori. Ai nuk do të nënshkruajë për të hequr dorë nga territori. Kushtetuta e ndalon një gjë të tillë. Askush nuk mund ta bëjë këtë, përveç nëse dëshiron të shkojë kundër Kushtetutës së Ukrainës dhe popullit ukrainas.”
Propozimi i fundit lë boshllëqe për çështjet më të diskutueshme, siç janë koncesionet përfundimtare territoriale, të cilat do të plotësohen vetëm pas bisedimeve private midis Zelenskyt dhe Trump. Presidenti ukrainas nuk ka njoftuar ende se kur do të udhëtojë për në Uashington ose Florida për t’u takuar me homologun e tij amerikan.
