KRYESORE POLITIKË TË FUNDIT
“Gjoba për ministrat që s’japin informacion”, Komisioneri Dervishi: Nuk është zgjidhje. Rama: Sanksionet, janë aty për tu zbatuar
16/12/2025 12:52
Kryeministri Edi Rama ka replikuar me Komisionerin për të Drejtën e Informimit, Besnik Dervishi lidhur me detyrimin që kanë institucionet për të kthyer përgjigje brenda afateve të parashikuara në ligj.
Gjatë një Konferencës Kombëtare për të Drejtën e Informimit, kreu i qeverisë paralajmëroi saksione për ministrat dhe sekretarët e përgjithshëm që nuk zbatojnë afatet.
Por nuk ishte i këtij mendimi Komisioneri Dervshi, i cili tha se sanksionet nuk janë instrumenti më i vlefshëm.
Replikat
Edi Rama: Ligji është shumë i qartë, 10 ditë është koha për tu përgjigjur. Dita e 11 nëse nuk ka përgjigje ka sanksione, kështu thotë ligji, duhet sanksionuar autoriteti përgjegjës.
Ne i kemi kërkuar ministrave që të bëjnë delegimin e kësaj përgjegjësie, disa e kanë bërë e disa jo akoma, duhet të sanksionohen ministrat dhe sekretarët e përgjithshëm në ditën e 11. Nëse kjo do të ndodhë në mënyrë të përsëritur jam e bindur që do të krijohet ndjesi urgjence.
Besnik Dervishi: Në diskutimet që kemi pasur, e kam përmendur shpesh pjesën e gjysmës gotës plot dhe gjysmës së botës bosh. Është e pranueshme nga të gjithë…
Edi Rama: Unë nga ty e mësova këtë.
Besnik Dervishi: Sot kemi një informacion që kurrë më parë nuk ka qenë i disponueshëm. Do të thoja diçka për sanksionet. Unë nuk besoj te sanksionet, nuk besoj që është instrumenti më i vlefshëm për korrigjimin. Ka qenë një debat i hershëm. Është një kritikë me të cilën jam mësuar. Jo se ne nuk kemi vendosur sanksione. Jo se kam marrë urdhër nga kryeministri, por besoj se ka ardhur koha të aplikohen edhe sanksione. Besoj se 10 vjet ligj për të drejtën e informimit, kultura ndërgjegjësuese është e mjaftueshme. Meqenëse iu referuam gotës, unë i bie të jem tabakaja që mban gotën dhe ju garantoj se nuk do më dridhen duart për ta derdhur ujin që është në dhe aq më pak të thyhet gota.
Edi Rama: Nuk e di për çfarë arsye më provokon tani. Unë besoj që sanksionet janë aty për tu aplikuar dhe zbatuar. Ti je më i butë se unë se je nga lumi i Vlorës, unë jam nga zona problematike. Unë besoj te sanksionet se në fund të ditës nuk janë aty kot dhe nuk janë aty për të ndenjur aty të pazbatuara. Nuk besoj te autorregullimi i shqiptarëve. Po i kthehem historisë së mediave online, u bë një debat shumë i madh për një propozim shumë herë më modest se çfarë po gatuhet sot në BE për mediat online. U bë një nam i zi për lirinë dhe demokracinë dhe na e lanë si gozhdë “ligjin e medias”. Ishte një draft ku kërkoheshin disa gjëra elementare, që nga deklarimi i personave që janë pas një portali, adresa dhe mundësia për çdokënd që ta dijë që kush po i lexon librin e shtëpisë. U tha që autorregullimi do sjellë një nivel tjetër në botën online. Siç e keni parë, jo vetëm që nuk ka pasur vetërregullim, por ka pasur degjenerim. Me gotën gjysmë plotë iu uroj Vitin e Ri. Më falni për ndërhyrjen e dytë, por më provokoi komisioneri.
Eglantina Bardhi: Me gotë mendoj se ishte shumë herë më mirë se me epitetet e tjera, si kazan apo …
Besnik Dervishi: Tani po provokohet Komisioneri.
Edi Rama: Kazani është një term…
Eglantina Bardhi: Ta mbaroj të lutem.
Edi Rama: Jo, jo se ju flisni për saktësi informimi, apo jo? Kazani është një term i vitit 2017, mirë po që ka qenë termi i duhur iu ka mbetur në mendje. Ky ka qenë dhe qëllimi që tu mbetet në mendje dhe të mos kemi nevojë t’ua përmendim më. Unë se kam përmendur më, por u ka mbetur në mendje. Po të pyesni popullin shqiptar, ai e konfirmon edhe sot. Natyrisht që nuk është e gjitha kazan, por më mirë ta mbyllim tani Besnik.
Besnik Dervishi: Jam plotësisht dakord, nuk do të doja që të provokoja më.
Edi Rama: Formati i sotëm, ambasadorët duhet të rrinë atje (tregon karriget e rreshtit të pasëm), si gjithë të tjerët. Pse duhet të rrinë këtu në tavolinë. Pastaj pse disa këtu, disa atje.
Besnik Dervishi: Do ta realizojmë edhe Konferencën e tetë dhe kryeministri sapo e konfirmoi prezencën.
Edi Rama: Pa ambasadorët në tavolinë.
Besnik Dervishi: Besoj se do kem mirëkuptimin e gjerë të ambasadorëve.
