Ministrja e Drejtësisë, Etilda Gjonaj është thirrur sot në një raportim në Komisionin e Sigurisë në lidhje me amnistinë që dha këtë fundvit qeveria për të dënuarit, ku përfituesit ishin kryesisht gratë dhe të miturit. Gjatë fjalës së saj Gjonaj tha se kjo nismë u ndërmor pas një pezullimi prej 3 vitesh, ndërsa theksoi se amnistia kishte qëllim humanitar dhe sipas saj nuk ka në fokus të vendimit lirimin e burgjeve. Ministrja pohoi se kjo nismë nuk përfshinte kategorinë e të dënuarve që cilësohen me rrezikshmëri të lartë shoqërore.
“Do rinisim me regjimin 41 bis. Regjimi ishte pezulluar për shkak të tërmetit. Amnistia vjen pas 3 vitesh kur nuk ka pasur. Parimet kryesore të udhëhequr për hartimin e kësaj amnistie, janë e drejta e trajtimit njerëzor duke pasur dhe në konsideratë vlerësimin e kategorisë së ulët të rrezikshmërisë së këtyre personave. Ndaj e kemi ndërmarrë këtë nismë ligjore. S’ka në fokus kryesor lirimin e burgjeve, dhe mbështet dy grupe, gratë dhe të miturit. Gratë kanë kryer kryesisht vepra penale për shkak të rrethanave për motive ekonomike, apo aty për aty. Amnistia e dënimit është akti që shpreh vullnetin shtetëror dhe për nga fryma e ligjit. Qëllimi parësor i kësaj amnistie janë gratë dhe të miturit. Kjo kategori kërkon një tjetër mundësi për rehabilitim. Janë marrë parasysh veprat penale për të cilat ashpërsia e dënimit nuk ka qenë e madhe. U ndala të sqaroj se pse këto dy kategori kanë qenë në fokusin kryesor. Në disa raste në opinion publike është parë se mund të ketë dhe elemente diskriminues, për faktin që është ndjekur për këto kategori.”, tha ministrja Gjonaj.
