Viti 2020 ka nisur ters për Barcelonën. Mes eliminimeve nga kompeticionet, shkarkimit të trajnerit, deklaratave të forta, merkatos së dështuar ka edhe… sherre. Gjithçka që ndodh jashtë skuadrës integrohet pa dashje në dhomat e zhveshjes dhe sjell tension mes futbollistëve. Pak ditë më parë u raportua se ka pasur një përplasje mes dy peshave të rënda në skuadër për një finte, por tani është zbuluar e vërteta.
Sherri në fakt nuk ka qenë për një finte, por për një top të humbur dhe dy emrat e lojtarëve që u përfshinë janë Lionel Mesi dhe Mark Andre Ter Shtegen. Ata kanë diskutuar ashpër me njëri-tjetrin për një top të humbur dhe është dashur ndërhyrja e shokëve të skuadrës që situata të mos bëhej më e rëndë. Duket e çuditshme që Mesi dhe Ter Shtegen u përfshinë në këtë ngjarje, sepse të dy kanë raport shumë të mirë.
Ter Shtegen postoi menjëherë një foto kur Leo Mesi fitoi “Topin e Artë” për herë të gjashtë duke e shoqëruar me përshkrimin: “I merituar”. Leo thuhet se e ka falënderuar dhe i ka shkruar në mesazh privat se ky trofe ishte edhe i portierit gjerman.
Deklaratat – Mirëpo, gjatë kësaj kohe Leo Mesit nuk i kanë pëlqyer aspak deklaratat e shumta që ka bërë Ter Shtegen pas disa ndeshjeve, sidomos pas Slavias së Pragës në Champions. Gardiani gjerman tha përpara mediave se kjo skuadër ka shumë gjëra për të folur dhe për të rregulluar, prandaj duhet ta bëjë sa më shpejt.
Mesi si kapiten nuk ka dashur kurrë që lojtarët të krijojnë polemika, por të mbajnë një profil të ulët në publik dhe thjesht të bëjnë detyrën e tyre në fushën e lojës. Eliminimi nga Kupa e Mbretit nuk shërben aspak për të qetësuar kampin katalanas, i cili u trondit nga dëmtimet e shumta të Suarezit dhe Dembelesë, por edhe nga replika e ashpër që kapiteni Leo Mesi bëri ndaj drejtorit Erik Abidal. Kike Setien nuk do ta ketë të lehtë për ta rimëkëmbur këtë ekip.
