Nga Alfred Peza
Dikush duhet ti këshillojë liderët kryesorë të opozitës sonë, se të mundësh Edi Ramën për tu rikthyer në pushtet me anë të propogandës, është njësoj si të besosh se do të mbërrish një ditë në Hënë, duke hedhur orë e çast në ajër, raketa prej letre. Lulzim Basha, Sali Berisha, Ilir Meta dhe Monika Kryemadhi kanë 6-7 vjet që e bëjnë këtë papushim. E vazhdojnë që ta bëjnë, ende edhe sot, pa u lodhur. Çmenduria është, se duket që do të vazhdojnë ta bëjnë, edhe në të ardhmen.
Në mundësi për të fituar përmes programesh, alternativash, kauzash, të vërtetash, informacionesh të sakta dhe marrëdhënieve me publikun, opozita i është falur propogandës e cila lundron përmes rrymave të spekullimit e gënjeshtrave. Pasqyra më e mirë për ta parë këtë qasje, është ajo e orëve të fundit, kur po rreken dëshpërimisht që të errësojnë, njollosin, përbaltin, eklispojnë dhe zhbëjnë aktin e shkëlqyer të kryeministrit Edi Rama për dërgimin në Lombardi, të 30 mjekëve dhe infermierëve shqiptarë si kontribut në luftën kundër Covid-19.
Ky akt simbolik solidariteti, i ndërmarrë në kulmin e pandemisë globale, ka marë mirënjohjen e çdo italiani. Duartrokitjen e një pafundësie personalitetesh ndërkombëtare të të gjithmë fushave. Krenarinë e çdo shqiptari kudo ku jeton e punon në rruzullin tokësor. Vëmendjen e çdo europiani. Dhe fokusin e mediave kryesore botërore. Më shumë sesa aksionet politike të Edi Ramës brenda Shqipërisë, ky akt rrit imazhin pozitiv të Shqipërisë dhe shqiptarëve në arenën ndërkombëtare, për të cilin kemi aq shumë nevojë të gjithë.
Të vetmit që nuk e përshëndetën, që nuk e miratuan, që nuk e inkurajuan e nuk iu gëzuan këtij akti, ishin udhëheqësit e opozitës dhe propaganda e saj. Në vend që ti gëzonte si shqiptarë, i ka djegur aq shumë ky akt si politikanë dhe liderë të saj, sa është e dukshme që do tu duhet shumë kohë që ti dalë e keqja.
Ditën e nisjes së mjekëve drejt Italisë, Lulzim Basha e hoqi përfundimisht maskën e engjëllit që u mundua ti vendoste vetes javët e fundit. Doli në një media dhe si kurrë më parë në jetën e tij politike, i ra tavolinës live, me… grushta. Të tjerë politikanë opozitarë poshtë tij dhe mediat pranë tyre, e morën atë për sinjalin e fillimit të operacionit propogandistik të radhës, kundër Edi Ramës. Pasi “propaganda përdor përgjithësisht emocionet primitive si dashuria, frika, besnikëria, urrejtja, paragjykimi” për arritjen e qëllimeve të saj.
Nuk vonoi shumë dhe nisën të përhapnin pa u lodhur, helmin e propogandës së tyre në rrjetet sociale dhe media. Herë duke thënë se mjekët dhe infermierët që kaluan “Adriatikun” ishin të paçertifikuar. Herë se kishin ikur “pa lejen e mamasë”. Se kishte mes tyre që nuk ishin infermierë, por pompistë karburanti. E më tej akoma, çfarë nuk do të thonë tjetër, vetëm që akti simbolik i qeverisë shqiptare të përflitet, përqeshet, banalizohet, amortizohet, minimizohet e në fund fare, mundësisht që të zhbëhet.
A nuk kanë vepruar kështu edhe më parë, kur është dashur që të zhbëjnë reformën në drejtësi? Kur sajuan “Babalen”? Kur sulmuan aksionin kundër lojërave të fatit? Kundër informalitetit në fushën e energjisë elektrike dhe kontrollit mbi territorin? E deri tek aksionet e Operaiconit “Forca e Ligjit” (OFL) kundër AntiKÇK-së?
E njëjta rrugë po përdoret sot, edhe kundër 30 mjekëve dhe infermierëve shqiptarë, që ndodhen në vijën e parë të frontit të luftës kundër Covid-19. Një operacion tipik propogande përmes të cilit po mundohen që ti prezantojnë opinionit publik fakte të seleksionuara, duke dërguar drejt tyre mesazhe të ngarkuara negativisht. Me qëllimin final, nxitjen përmes opinioneve dhe komenteve, reagime emocionale negative dhe jo qëndrime racionale.
Kundër kësaj strategjie, Edi Rama po përdorur atë që di të bëjë më mirë se kushdo tjetër në këtë vend: Marrëdhëniet me Publikun (PR). Siç ka bërë gjatë gjithë këtyre viteve, e deri vonë me menaxhimin e situatës së tërmetit dhe tani, me luftën kundër koronavirusit. Përmes të cilave ndihmon opinionin që të kuptojë sa më mirë mesazhet qeverisëse që vijnë përmes programeve, projekteve dhe punëve konkrete, e përkthyer në të mirë të çdo qytetari dhe shoqërisë shqiptar në tërësi.
Ndaj nëse vazhdon kështu, Lulzim Basha të mos çuditet qershoin e vitit të ardhshëm, kur ta shohi sërisht Edi Ramën që të bëjë fushatën elektorale me “lodra e dajre” nëpër Shqipëri dhe ai të qëndrojë më pas edhe 4 vite të tjera në opozitë. Kuptohet, nëse do të ketë akoma brenda PD, që do ta mbajnë atë sërisht Kryetar edhe pas kësaj!
