Një foto e shpërndarë nga bashkëshortja Alyssa në rrjetet sociale pak ditë më parë bëri të njohur në të gjithë Shtetet e Bashkuara dhe më tej mjekun Jared Burks.Në fotografi, shihet mjeku nga Jonesboro në Arkansas që i ndarë nga xhami i derës së shtëpisë, prek dorën e vogël të djalit të tij 1-vjeçar, që po ecte për herë të parë.Arsyeja e ndarjes ishte pikërisht karantina e detyruar për mjekun që po punonte me orare të stërzgjatura në pavionet e spitalit që po mbusheshin me pacientë të infektuar nga koronavirusi.
Fotografia u shpërnda në rrjet më shumë se 70 mijë herë, duke u shndërruar në një pamje simbol të sakrificave të personelit mjekësor në luftën kundër COVID-19.Por viti 2020 do të duhet të harrohet sa më shpejt nga mjeku dhe familja e tij.
Pak ditë më vonë, gruaja e tij deklaroi se shtëpia e tyre, përfshirë edhe xhami që ndante babë e birë në foto, ishin shkatërruat totalisht nga një tornado.“Jemi të gjithë mirë, por shtëpia iku. Jared ishte brenda, por për fat ka shpëtuar”, deklaroi bashkëshortja, duke treguar rrënojat e shtëpisë.Të shtunën e kaluar një seri tornadosh ka krijuar panik dhe shkatërrim në shtetet e Arkansas, Illinois dhe Iowa, duke plagosur 22 persona, por pa lënë viktima.
