Në Kinë rezulton se 14% e pacientëve që janë shëruar nga koronavirusi janë infektuar sërish. Këto të dhëna janë bërë publike nga ekspertët mjekësorë, të cilët thonë se disa pacientë kanë rezultuar sërish pozitiv.
Ky lajm vjen pas alarmit të ekspertëve, të cilët i druhen faktit se Kina mund të përballet me një valë të dytë të epidemisë për shkak të rasteve të importuara apo shtetasve të huaj që udhëtojnë drejt Kinës, por dhe atyre personave që nuk kanë simptoma edhe pse mund të jenë të infektuar.
Mjekët në Kinë zbuluan në një spital në Wuhan, vendi ku shpërtheu epidemia që më pas u klasifikua si pandemi, se 5 nga 147 pacientët e shëruar rezultuan sërish pozitiv ndaj virusit. Por, këta pacientë që rezultojnë të infektuar për herë të dytë pas rikuperimit, nuk shfaqin simptoma të sëmundjes.
Një pikë e rëndësishme e studimit është edhe fakti që këta mbartës të virusit për herë të dytë, nuk kanë infektuar persona të tjerë, pasi anëtarët e familjeve të tyre rezultuan negativ ndaj testit. Ekspertët mjekësor këshillojnë që pacientët e rikuperuar të mbahen nën vëzhgim dhe të qëndrojnë në karantinë për të paktën 14 ditë.
