Futbolli po e vuan njësoj si të gjithë pandeminë e “Coronavirus”. Jo vetëm se është ndalur së luajturi, por sepse futbollistë e trajnerë janë prekur. Një i tillë është edhe Jonathas Cristian de Jesus, i njohur shkurt me emrin Jonathas, sulmuesi i Elche në Spanjë, i cili rrëfen përvojën e keqe për shkak të infektimit:
“Nuk mund të stërvitesha, sepse trupi im ishte i dobët. Sidomos gjatë tri ditëve të para, kam vuajtur shumë. Nuk kisha forcë as të lëvizja nga vendi. Kur shkova për të bërë dush, për pak më ra të fikët. Ndieja një dhimbje të fortë, kurrë nuk më kishte ndodhur më parë. Ky virus nuk është një shaka. Më dhemb zemra, sepse nuk mund të qëndroj me princeshat e mia.
Nisa të përjetoja një ndjesi shumë të keqe, dhimbje të forta koke. Mëngjesin tjetër, mjeku më rekomandoi të bëja testin, sepse kisha të gjitha simptomat e “Coronavirus”. Tani jam mirë, por, pavarësisht se mund të jesh sportist, vuan shumë. Imagjinojeni se çfarë mund t’i ndodhë një njeriu në moshë të thyer!”
Tashmë, më e keqja ka kaluar për Jonathas, i cili vazhdon të qëndrojë i izoluar në shtëpi, në Spanjë, ndërsa bashkëshortja dhe vajzat janë në Brazil.
