Pas publikimit te “TemA” të lajmit të kontratës së lobimit të Bashës në SHBA me një kompani që lobon dhe për presidentin venezeluan Manduro, ka reaguar kreu i grupit parlamentar të PS, Taulant Balla.
Numri dy i PS thotë se kjo kontratë me vlerë 60 mijë dollarë e firmosur më 10 mars, në kulmin e masave për pandeminë, duke treguar sipasj tij papërgjegjshmërinë e liderit demokrat.
Postimi i plotë i Ballës:
Departamenti Amerikan i Drejtësisë, përmes Aktit të Rregjistrimit të Agjentëve të Huaj ka rregjistruar më 20 Mars 2020, një kontratë të re lobingu në SHBA të Partisë Demokratike me një kompani që ndër klientët e vet rregjistron edhe zyrtarë të lartë të regjimit të Maduros në Venezuelë.
O zot, si ka mundësi, kur të gjithë shqiptarët janë bërë bashkë në këtë Luftë me Covid-19, ku nevoja për solidaritet social e mbështetje për njerëzit në nevojë është aq e domosdoshme nga të gjithë, ky që merr guximin të japë edhe mend e plane, paguan shuma kaq të mëdha parash për të nxirë Shqipërinë në media amerikane, apo në zyrat e Kongresit amerikan.
Po si mund të dalësh për ditë në TV, e të drejtosh gishtin se nuk po ndihmohen familjet në nevojë, se nuk po financohen spitalet, nuk po paguhen infermiret, punonjësit e policisë, nuk po i jepet ndihmë financiare biznesit, kur vetë bën rrush e kumbulla paratë që partia jote merr nga buxheti i shtetit.
Do të ishte shumë me vlerë të ndihmoje disa qindra familje shqiptare me ndihma ushqimore me këto para, Lulzim.
Mos prisni as sqarim, e as ndjesë publike nga ky e nga këta.
