Ashtu si edhe javën e shkuar, e diela do t’u përkasë pensionistëve dhe prindërve me fëmijë nën 14 vjeç, të cilët do të mund të lëvizin me fasha të caktuara orari.Liridalja për moshën e tretë zgjat deri në orën 10:00 paradite, ndërsa prindërit dhe fëmijët nën 14 vjeç do të kenë mundësi të lëvizin nga ora 11:00 paradite deri në 17:30 pasdite.
Asnjë biznes nuk është i hapur ditën e sotme, duke patur një mbyllje totale, ndërsa duke filluar nga dita e nesërme do të fillojnë lehtësimet edhe për disa biznese të tjera. Kështu të hënën do të mund të rifillojnë aktivitetin e tyre parukeritë, berberët, klinikat dentare dhe dyqanet në qendrat tregtare, por duke ruajtur distancimin social dhe me vetëm 1 klient apo pacient në radhë. Gjithashtu është planifikuar që brenda qarqeve automjetet do të lëvizin pa autorizim, nga ora 05:00 deri në 17:30.
