Ka nisur zbatimi i Marrëveshjes së Mirëkuptimit të nënshkruar rishtazi mes Këshillit të Lartë të Gjyqësorit dhe USAID, në mbështetje të Gjykatës së Lartë për përmirësimin e efikasitetit dhe uljen e numrit të çështjeve të prapambetura.
Në kuadër të kësaj marrëveshje, u zhvillua të mërkurën një takim midis Gjykatës së Lartë, Këshillit të Lartë Gjyqësor dhe Projektit të USAID-it Drejtësi për të Gjithë.
Sipas njoftimit për mediat, kryetarja e Këshillit të Lartë Gjyqësor, Naureda Llagami, zv.kryetari i Gjykatës së Lartë Ardian Dvorani, si edhe anëtarët e kësaj gjykate, gjyqtarët Sokol Sadushi, Ilir Panda dhe Ervin Pupe, u takuan me drejtoren e Projektit, Anne Trice dhe zv.drejtoren e Projektit, Olta Lolo, për të diskutuar rreth hapave konkretë për zbatimin e kësaj marrëveshje.
Pjesëmarrësit rishikuan dhe diskutuan mbi kërkesat e Marrëveshjes së Mirëkuptimit dhe ranë dakord mbi disa çështje të cilat kanë të bëjnë me: Konceptet për të ofruar një ndërgjegjësim më të lartë të publikut rreth Gjykatës dhe mbështetjes që ajo do të marrë, në këtë kuadër; Afatet kohore për përgatitjen e thirrjeve për aplikim për Nëpunësit për Uljen e Numrit të Çështjeve të Prapambetura; Caktimin e personelit nga Gjykata e Lartë që do të asistojë Projektin Drejtësi për të Gjithë për të përkufizuar më mirë përmirësimet që i nevojiten sistemit të menaxhimit të çështjeve në gjykata.
Zbatimi në praktikë i këtij memorandumi pritet të sjellë jo vetëm reduktimin e numrit të çështjeve të prapambetura në Gjykatën e Lartë, por dhe parandalimin e shtimit të mëtejshëm të tyre.
Gjatë ditëve në vijim, pjesëmarrësit do të punojnë mbi plotësimin e detyrave individuale të cilat do të diskutohen në një takim tjetër në javën që vjen.
