Mali i Zi mbyll kufirin me Shqipërinë si shkak i përhapjes së rasteve të reja me koronavirus. Ky lajm është bërë me dije nga Ministria për Evropën dhe Punët e Jashtme, ku përmes një njoftimi në rrjetet sociale ka njoftuar se Njësia Operacionale e Krizës së Qeverisë së Malit të Zi ka vendosur sot të rishikojë listën e vendeve që do të lejohen të hyjnë në territorin e tij si shkak i përhapjes së virusit Covid-19.
Duke marrë shkas nga numri i personave të infektuar, ku Shqipëria e ka kaluar numrin 700 (limit ky i vendosur më parë nga autoritetet malazeze dhe që e kalon shifrën 25 të infektuar për 100.000 banorë), bën që Mali i Zi të mbyll kufirin me vendin tonë.
Megjithatë nga ky vdendim përjashtohen disa kategori udhëtarësh që kanë një funksion dhe nevoja thelbësore.
Njoftimi i Plotë:
Ministria për Evropën dhe Punët e Jashtme njofton se Njësia Operacionale e Krizës së Qeverisë së Malit të Zi ka vendosur sot të rishikojë listën e vendeve që do të lejohen të hyjnë në territorin e tij në kuadër të luftës kundër pandemisë COVID-19. Nisur nga numri në rritje i shtetasve të infektuar aktiv në vendin tonë, që aktualisht e kalon numrin 700 (limit ky i vendosur më parë nga autoritetet malazeze dhe që e kalon shifrën 25 të infektuar për 100.000 banorë), autoritetet malazeze kanë vendosur të mbyllin kufijtë tokesorë me Shqipërinë dhe të lejojnë hyrjen tranzit në territorin malazez vetëm për shtetasit që prezantojnë në kufi dokumentin e testimit negativ ndaj COVID-19, të bërë brenda 48 orëve.
Nga ky kufizim përjashtohen udhëtarët që kanë një funksion/nevojë thelbësore, si:
– profesionistët shëndetësorë, kërkuesit mjekësorë; – personeli i angazhuar me transportin e mallrave dhe çdo personel tjetër transporti; – diplomatët, stafi i organizatave ndërkombëtare, personeli ushtarak dhe punonjës të ndihmës humanitare gjatë ushtrimit të funksioneve të tyre; Kategori të veçanta pasagjerësh në tranzit; Personat që kanë nevojë për mbrojtje ndërkombëtare në Malin e Zi, ose për arsye të tjera humanitare.
Ky regjim fillon prej mesnatës të së dielës, datë 21 qershor 2020, dhe është i vlefshëm deri në një vendim të dytë të Njësisë Operacionale të Krizës në Podgoricë.
