Kryetari i Kuvendit, Gramoz Ruçi, deklaroi sot se s’ka arsye ligjore që me mos hapjen e të gjitha vendeve të vakancave në Gjykatën e Lartë dhe Kushtetuese të mbahet peng Shqipëria deri në Bruksel.
Duke iu drejtuar kryetares së KLGJ-së, Neureda Llagami, e cila mbajti raportin vjetor të Këshillit të Lartë Gjyqësor mbi gjendjen e sistemit gjyqësor dhe veprimtarinë për vitin 2019, Ruçi theksoi se “kam vetëm një sugjerim për ju që është përsëritje e pikës së parë që i është vendosur institucionit që ju drejtoni për vitin 2020 që ka të bëjë lidhur me shpalljen e menjëhershme të të gjitha vendeve të lira në Gjykatën e Lartë dhe përmbylljen sa më shpejt të procesit të plotësimit të këtyre vendeve”.
“Kuvendi, publiku shqiptar dhe partnerët tanë janë të interesuar se kur do të plotësohen vakancat në Gjykatën e Lartë dhe atë Kushtetuese që është rrjedhojë e mosplotësimit të Gjykatës së Lartë? S’ka asnjë arsye as ligjore që ju me mos hapjen e të gjitha vendeve të mbani peng Shqipërinë deri në Bruksel për këtë çështje. Lidhur me këtë rezolutë që Kuvendi do ta votojë sot për këtë pikë qoftë Komisioni përkatës i Ligjeve, qoftë edhe seanca e posaçme për këtë çështje, kur themi të hapen menjëherë dhe të përfundojë sa më shpejt, shumë shpejt të mos jemi tek momenti që të preokupohet Komisioni i Ligjeve për moszbatim të kësaj pike të rezolutës dhe të preokupohet një mbledhje e posaçme e Kuvendit vetëm për mosplotësim të kësaj rezolute”, – theksoi Ruçi.
Kryetarja e KLGJ-së, Neureda Llagami, duke iu përgjigjur pyetjes së deputetëve tha se “jemi në fazën e e vijimit të procesit si Këshill për zbatimin e Reformës në Drejtësi, ndërsa vetingu është proces paralel që bën identifikimin e personave të ekspozuar ndaj korrupsionit. Këshilli ka filluar punën dhe besoj që edhe Këshilli do marrë shumë masa për gjyqtarët e korruptuar apo që ka indicie se janë të tillë”.
