Bypass-i i Tepelenës, një tjetër vepër e rëndësishme e infrastrukturës kombëtare, pjesë e aksit Veri-Jug, është tashmë i hapur për qarkullimin e mjeteve. Kryeministri Edi Rama ndau sot pamje nga bypass-i i Tepelenës, investim i qeverisë, në vazhdën e projekteve të zhvillimit të infrastrukturës së vendit.
“Mirëmëngjes dhe ju uroj rrugë të mbarë në Bypass-in e Tepelenës”, tha Rama. Investimi, i cili i jep një hov të ri zhvillimit ekonomik, por dhe turistik të gjithë Qarkut, bën lidhjen e dy segmenteve rrugore, segmentin e sapondërtuar Levan-Tepelenë me segmentin Tepelenë-Gjirokastër-Kakavijë.
Me ndërtimin e këtij bypassi bëhet e mundur gjithashtu transformimi i Tepelenës, nga një kthesë e braktisur, në një zonë turistike. Projekti parashikon mbrojtje lumore poshtë kalasë, mbjellje me pemë në skarpatet përgjatë rrugës, përmirësim i aksit mbi aksin ekzistues, përmirësim i nyjes në hyrje të qytetit të Tepelenës dhe lehtësim në qarkullim.
Gjithashtu, është realizuar rrethrrotullimi në sheshin “Ali Pasha”, zgjerimi i rrugës dhe realizim i trotuareve për këmbësorët që duan të vizitojnë kalanë, si dhe pastrimi dhe rehabilitimi i mureve të kalasë, ndriçimi i rrugës, mbrojtje e skarpateve dhe gjelbërim i gjithë zonës.
