Studime të shumta kanë arritur në përfundimin se maskat mund t’i parandalojnë njerëzit të përhapin mikrobet e rrugëve të frymëmarrjes te të tjerët. Por tani një hulumtim i ri i studiuesve amerikanë ka zbuluar se maskat mbrojnë edhe njerëzit që i veshin ato, duke ulur ashpërsinë e simptomave, ose duke parandaluar infeksionin plotësisht në disa raste.
Duke përdorur eksperimente dhe vëzhgimet e kafshëve gjatë pandemisë, shkencëtarët thonë se njerëzit me maska infektohen më pak nga koronavirusi, duke e bërë më të lehtë për sistemet imunitare të luftojnë çdo përhapje virale. Lloje të ndryshme maskash “bllokojnë virusin në një shkallë të ndryshme, por të gjitha ato bllokojnë virusin të hyjë në organizëm”, tha Dr. Monica Gandhi, një mjek i sëmundjes infektive në Universitetin e Kalifornisë, San Francisko. Nëse ndonjë grimcë e virusit shkel këto pengesa, tha ajo, sëmundja mund të jetë akoma më e butë.
Idetë për rëndësinë e dozës virale në përballimin e sëmundjeve janë studiuar që të paktën në vitet 1930, kur dy studiues zbuluan zyrtarisht se minjtë e ekspozuar ndaj sasive më të mëdha të mikrobeve kishin më shumë gjasa të vdisnin. Kohët e fundit, shkencëtarët zbuluan se më e madhe ishte ngarkesa virale që hynte të trupin e pacientëve, aq më shumë simptoma shfaqnin ata.
Ky lloj eksperimenti nuk mund të merret i mirëqënë për koronavirusin e ri, duke pasur parasysh se sa i rrezikshëm është. Por në fillim të këtij viti, një ekip studiuesish në Kinë provuan diçka të ngjashme me minjë. Ata strehuan kafshë të infektuara nga koronavirusi dhe vendosën në kafaze fqinj minjë të shëndetshëm, disa prej të cilëve iu vunë maska kirurgjikale. Shumë nga minjtë me maska nuk u infektuan kurrë. Dhe ato që u sëmurën, ishin në gjendje më të lehtë shëndetësore se fqinjët e tyre “pa maskë”.
Disa të dhëna indirekte janë grumbulluar edhe nga pacientët me Covid-19. Studiuesit kanë vlerësuar se rreth 40 për qind e të infektuarve me koronavirus nuk kanë asnjë simptomë. Por kur disa njerëz veshin maska, përqindja e rasteve asimptomatike duket se rritet dhe tejkalon 90 për qind, për shembull si në një fabrikë në Oregon. Veshja e maskës nuk i bën njerëzit të paprekshëm nga infeksioni, por këto tendenca të rasteve asimptomatike mund të sugjerojnë që maska bën që ta përballoni Covid-19 më lehtë, duke zvogëluar potencialisht mbingarkimin e spitaleve dhe vdekjen.
Veçanërisht bindëse, sipas Dr. Gandhi, janë të dhënat nga anijet e lundrimit. Më shumë se 80 për qind e të infektuarve në anijen japoneze “Diamond Princess Japoneze” kishin simptoma. Por në një anije tjetër që u nis nga Argjentina në mars, kur të gjithë pasagjerët veshën maska kirurgjikale pasi njëri nga udhëtarët kishte ethe, niveli i rasteve simptomatike ishte mbi 20 për qind.
