Gradualisht, detajet kanë filluar të bëhen publike në lidhje me duelin e shumëpritur, ku boksieri legjendar amerikan, Mike Tyson, 54 vjeç, do të rikthehet në ring, 15 vite pas ndeshjes së tij të fundit. Përballë do të ketë Roy Jones Jr., 51 vjeç, gjithashtu në “pension”. Ky duel do të jetë pjesë e “Legends Only League”, një event bamirësie, në të cilin do të marrin pjesë ish-emra të mëdhenj të sportit, cilido qoftë specialiteti i tyre.
Ndeshja do të zhvillohet më 12 shtator në Carson (California). Edhe pse Tyson do të dëshironte të ndeshej me Evander Holyfield, 57 vjeç, me të cilin ndan kafshimin e famshëm të veshit gjatë betejës për titullin botëror, më 1997, rival i tij do të jetë Jones. Jr, ish-kampion bote si ai. Dueli, që do të zhvillohet më 12 shtator në parkun sportiv “Dignity Health” të Carson (California), një impiant me kapacitet për 27.000 spektatorë, do të ketë tetë raunde. Përveç kësaj, disa rregulla që do të rregullojnë dyluftimin kanë dalë në dritë.
“Tyson dhe Jones Jr. nuk do të mbajnë mbrojtëse të kokës. Ata do të veshin doreza 12-ons (ato që zakonisht përdoren në boksin amator). Po ashtu, nuk do të ketë gjyqtari, për të llogaritur pikët, – tha Andi Foster, drejtori ekzekutiv i Komisionit Atletik të Shtetit në Kaliforni për “Boxingscene”. – Në këtë mënyrë, nuk do të ketë fitues, përveçse kur njëri prej të dyve rrëzohet në tapet, ose njëri prej të dyve nuk konsiderohet i përshtatshëm për të vazhduar duelin. Pra, nuk do të ketë rezultat apo vendim për fituesin në fund të raundeve. Përballjen do ta gjykojë në ring Ray Corona, i cili duhet të vëzhgojë dhe të jetë i vëmendshëm për nivelin dhe rreziqet e të dy ish-boksierëve profesionistë. Nëse secili prej tyre pëson ndonjë dëmtim, do të urdhërojë të ndalet dueli.
“Ne të dy jemi luftëtarë të suksesshëm dhe dimë si të kujdesemi për veten. Gjithçka do të jetë mirë, na besoni”, – tha Tyson, kampion i dyfishtë botëror i peshave të rënda, por gjithashtu i njohur për karakterin e tij kontravers dhe problemet me drejtësinë. Në fakt, fytyra e tij e vërtetë u shfaq menjëherë, kur theksoi për ESPN: “Unë jam duke kërkuar të jem 100% Mike Tyson në ring. Nuk di si ta zhvilloj duelin në ndonjë mënyrë tjetër. Roy do të duhet të merret me këtë”.
