Solskjaer përgjigjet për spekulimet për Sanchon
Trajneri i Manchester Unitedit, Ole Gunnar Solskjaer, ka insistuar se ai nuk dëshiron të flasë për lojtarët e klubeve të tjera, në përgjigjen e tij ndaj pyetjeve për spekulimet e fundit lidhur me Jadon Sanchon.
Jadon Sancho është bërë prioriteti numër një për trajnerin Ole Gunnar Solskjaer këtë verë, pasi që Manchester Unitedi dhe Borussia Dortmundi kanë qenë duke e negociuar të ardhmen e tij gjatë javëve të fundit, transmeton Gazeta Express.
Megjithatë, Dortmundi e caktoi datën 10 gusht si afatin e fundit për Manchester Unitedin për ta kompletuar transferimin e 20-vjeçarit, pasi që gjiganti gjerman më këtë datë e nisi kampin parasezonal në Zvicër.
Sancho ishte pjesë e skuadrës së Lucien Favre që udhëtoi drejt Zvicrës për përgatitjet parasezonale dhe pasi marrëveshja mes dy klubeve nuk u arrit, drejtori sportiv Michael Zorc sugjeroi të hënën se shpresat e Unitedit për transferimin e Sanchos kanë marrë fund.
“Nuk mund të komentoj për lojtarët e klubeve të tjera, nuk mund ta bëj këtë. Ju e dini, nuk e bëj kurrë një gjë të tillë”, tha Solskjaer, kur u pyet për këto spekulime për Sanchon.
Megjithatë, media të shumta britanike raportojnë se Manchester Unitedi nuk do të dorëzohet për transferimin e talentit anglez, përkundër që është i irrituar me ngadalësinë me të cilën po shkojnë negociatat, që, sipas kërkesës së Dortmundit, po menaxhohen nga një agjent i pavarur.
Edhe Sancho raportohet të jetë i interesuar për një transferim në Old Trafford dhe mediumet e mëdha evropiane raportojnë se për transferimin e tij nuk është pengesë marrëveshja mes lojtarit dhe Djajve të Kuq, por vetëm mes këtyre të fundit dhe klubit gjerman.
