Demokratët në Shtetet e Bashkuara emëruan të martën ish-Nënpresidentin Joe Biden për të qenë kandidati i tyre në zgjedhjet për president që do të zhvillohen në muajin nëntor. Për të dytën mbrëmje, republikanë të njohur iu bashkuan demokratëve duke kritikuar Presidentin Donald Trump dhe duke lavdëruar aftësitë udhëheqëse të Joe Biden-it. Zoti Biden ishte kandidati i pritshëm i kësaj partie prej disa muajsh pasi fitoi gjatë zgjedhjeve paraprake dhe votimeve të degëve të partisë përballë një sërë kandidatësh demokratë për president, ndër ta edhe rivali i tij më i afërt, Senatori Bernie Sanders, nga shteti Vermont. Në mbrëmjen e dytë të Konventës Kombëtare Demokrate, votimi tradicional në sallë për emërimin e kandidatit të partisë, u zëvendësua nga përfaqësues që flisnin përmes lidhjes me internet nga shtetet dhe territoret përkatëse, duke u zotuar të mbështesin zotin Biden ndërsa përballet me Presidentin republikan, Donald Trump.
Në përfundim të emërimit zoti Biden falenderoi përkrahësit për mbështetjen që i dhanë. Ai pritet të mbajë fjalimin për të pranuar emërimin gjatë mbrëmjes së fundit të konventës, ditën e enjte. Ndërkohë që demokratët i zhvillonin punimet nëpërmjet lidhjeve në distancë, Presidenti Trump udhëtoi të martën në dy shtete kyçe për betejën elektorale, Ajoua dhe Arizona. Ai njoftoi paraprakisht faljen e aktivistes gjatë viteve 1870 për të drejtat e grave, Susan B. Anthony, duke synuar kështu të fitojë mbështetjen e grave votuese.
“Të gjejmë mëshirën dhe hirësinë”
Gruaja e zotit Biden, Jill, tha se nëse zgjidhet, bashkëshorti i saj do të sjellë në Shtëpinë e Bardhë një “udhëheqje të denjë për vendin tonë” në epokën e pandemisë historike të koronavirusit dhe depresionit ekonomik. “Ka njerëz që duan të na thonë se vendi ynë është i ndarë pa shpresë, se dallimet tona janë të papajtueshme. Por, kjo nuk është çfarë unë kam parë gjatë këtyre muajve”, tha Jill Biden në mbyllje të fjalës së saj. “Ne po bashkohemi dhe mbështetemi te njëri-tjetri. Po gjejmë mëshirën dhe hirësinë në momentet që dikur i merrnim për të mirëqena. Shohim se dallimet tona janë të çmuara dhe se gjërat e ngjashme janë të pafundme”.
“Kemi treguar se zemra e këtij kombi ende rrah me mirësi dhe kurajo. Ky është shpirti i Amerikës për të cilin Joe Biden po lufton tani”, tha ajo gjatë fjalimit të mbajtur nga një klasë në shkollën e mesme ku dikur ajo jepte mësim në qytetin Uilmington, të shtetit Dellauer. Jill Biden ka luajtur një rol aktiv, në prapaskenë, në kandidimin e tretë të burrit të saj për president gjatë tre dekadave. Ndihmësit thonë se ajo ofroi mendimet e saj për përzgjedhjen e një kandidateje për nënpresidente para se ai të zgjidhte javën e kaluar Senatoren e Kalifornisë Kamala Harris, duke e bërë zonjën Harris gruan e parë afrikano-amerikane dhe aziatike që konkuron për këtë post të lartë në Shtetet e Bashkuara. Zonja Harris do të mbajë fjalimin e pranimit në konventë të mërkurën, kur do të flasë edhe ish-Presidenti Barack Obama dhe Senatorja Elizabeth Warren.
Ish-Sekretari i Shtetit John Kerry, i cili shërbeu në administratën Obama-Biden, e shfrytëzoi fjalimin e tij mbrëmjen e së martës për të portretizuar politikën e jashtme të Presidentit Trump si një dështim. “Kur ky president shkon jashtë shtetit, ai nuk është një mision i vullnetit të mirë, është një përçapje turpëruese. Ai ndahet nga aleatët tanë dhe i shkruan letra dashurie diktatorëve. Amerika meriton një president që është shembull drejtuesi, dhe jo përqeshjeje”, tha zoti Kerry. Zoti Kerry shtoi se zoti Biden e kupton se problemet me të cilat përballet bota, përfshirë koronavirusin, terrorizmin dhe ndryshimin e klimës, nuk mund të zgjidhen “pa i bashkuar kombet me forcë dhe përulësi”.
Kohë krizash
Ish-Presidenti Bill Clinton kritikoi udhëheqjen e Presidentit Trump, veçanërisht në kohë krize. “Në një kohë si kjo, Zyra Ovale duhet të jetë një qendër komande. Përkundrazi, ajo është bërë një qendër stuhie. Ka vetëm kaos”, tha zoti Clinton. “Tani duhet të vendosni nëse do të rinovoni kontratën më të ose të punësoni dikë tjetër”.
“Nëse doni një president i cili e përcakton punën duke kaluar orë të tëra gjatë ditës duke parë televizor dhe duke sulmuar njerëz në mediat sociale, ai është njeriu juaj. Refuzimi, shpërqëndrimi dhe ofendimi funksionojnë shumë mirë nëse po përpiqeni të argëtoni dhe të provokoni. Por në një krizë të vërtetë, ajo shembet si një shtëpi prej letre”, tha ish-presidenti.
Javën tjetër, Presidenti Trump do të pranojë zyrtarisht emërimin e partisë së tij në Konventën Kombëtare Republikane.Presidenti Trump dhe Nën-presidenti Mike Pence po zhvillojnë aktivitete fushate gjatë javës që zoti Biden është në qendër të vëmendjes, duke udhëtuar në shtetet kyçe të betejës politike që mund të luanin një rol kryesor në zgjedhje.
Presidenti Trump u drejtua për në shtetin Ajoua, të martën dhe më vonë shkoi në Yuma, të shtetit Arizona, afër kufirit me Meksikën për të inspektuar ndërtimin e një muri kufitar që synon ndalimin e hyrjes së emigrantëve pa dokumenta në Shtetet e Bashkuara. Kjo temë ishte një shtyllë kryesore e kandidaturës së tij të suksesshme për presidencën në vitin 2016.Të enjten, Presidenti Trump planifikon të gjendet pranë shtëpisë së fëmijërisë së zotit Biden në Scranton, të shtetit Pensilvani.
