Organizata Transparency International ka publikuar së fundmi një raport ku analizohen ndër të tjera ndikimet e paligjshme në sundimin e ligjit dhe gjyësorin e vendeve të Balkanit Perëndimor dhe Turqisë. Raporti thekson se reformat e rekomanduara nga GRECO, organi monitorues i antikorrupsionit të Këshillit të Europës, për të implementuar sundimin e ligjit në Ballkanin Perëndimor dhe Turqi, janë shumë të lidhura me sfidat që i takojnë mungesës së pavarësisë së gjyqësorit në këto vende.
Lidhur me këto sfida, raporti vlerëson si shembull pozitiv Shqipërinë duke iu referuar vlerësimeve që vendi ynë ka marrë pikërisht nga organi monitorues i Këshillit të Europës-GRECO, për progresin e arritur në reformën e gjyqësorit. “Raporti i Katërt i Përputhshmërisë së Vlerësimit të GRECO (2019, 2020) mbi parandalimin e korrupsionit në lidhje me anëtarët e parlamentit, gjyqtarët dhe prokurorët në Shqipëri, Bosnjë dhe Hercegovinë, Malin e Zi, Maqedoninë e Veriut, Serbinë dhe Turqinë tregon nivele të ndryshme të zbatimit të reformës. Ndër interpretuesit më të mirë janë Shqipëria dhe Mali i Zi, i ndjekur nga Maqedonia e Veriut. Si një shembull pozitiv, GRECO mirëpret progresin e bërë në reformën gjyqësore në Shqipëri. Në veçanti, reforma ka rezultuar në kufizimin e rolit të presidentit të republikës në emërimin zyrtar të gjyqtarëve të Gjykatës së Lartë të propozuar nga Këshilli i Lartë Gjyqësor, i cili përbëhet nga një shumicë gjyqtarësh të zgjedhur nga kolegët e tyre. Për më tepër, administrata gjyqësore nuk është më brenda kompetencave të Ministrisë së Drejtësisë, por të Këshillit të Lartë Gjyqësor”, shkruan Transparency International.
