99.5% e rasteve me CoVid-19 në botë janë si pasojë e infektimin me variantin “italian” të Sars-Cov-2, mutacionin G, çka sugjeron se virusi i Vuhanit nuk është më prezent dhe në qarkullim. Këtë thotë virologu gjemran, Alexander Kekule, duke rindërtuar skemën e përhapjes së pandemisë dhe duke shpjeguar deri diku se përse disa vende në Azi, përfshirë Kinën, nuk po vuajnë më të njëjtën goditje si hemisfera perëndimore. Varianti italian është 10 herë më ngjitës se ai i Vuhanit, duke sqaruar ritmet e mëdha të infektimit. Mirëpo virologët italianë deklarojnë se mutacioni G ishte i praishëm në Vuhan që në fund të janarit 2020, por edhe në Gjermani, Australi.
Këtu çështja është jo vetëm mjekësore dhe kërkimore, por edhe politike, në një botë që përveçse po kërkon të ndalë pandeminë, është duke hulumtuar edhe “fajtorin”, apo vendin e origjinës. Nga ana tjetër, shkencëtarët janë tanimë në gjendje të thonë se pse virusi i tanishëm u përhap kaq shpejt: “faji” është i asimptomatikëve. Megjithatë studimet po sjellin në formën e një konkluzioni përfundimtar se CoVid-19 jep imunitet permanent.
“Duket se të shëruarit nga CoVid-19 jo vetëm konservojnë antitrupat, që zgjasin për një kohë të kufizuar, por edhe qeliza të kujtesës që riaktivizohen kur personi bie sërish në kontakt me virusin dhe i mundësojnë ta bllokojë menjëherë: janë garancia e një imuniteti permanent”, thotë për “Avvenire” Stefano Toppo, profesor në Departmanetin e Mjekësisë Molekulare në Padova. Ky përfundim pritet të publikohet së shpejti në kuadër të një studimi të gjerë, duke vënë disa piketa mbi debatin kryesor të tanishëm në botë për pandeminë: kohëzgjatjen e imunitetit dhe llojin e përgjigjes imunitare.
Deri më tani është trajtuar vetëm çështja e antitrupave, që ka rëndësi sepse ndikon në adoptimin e politikave shëndetësore dhe me këtë rast është injoruar qasja imunologjike. P.sh së fundmi nga Japonia vjen lajmi se imuniteti relativisht më i lartë aziatikëve ndaj CoVid-19 lidhet me ekspozimin më të hershëm të tyre ndaj disa llojeve të koronaviruseve. Mirëpo ky konstatim evidenton sesa i paqëndrueshëm është pohimi se imuniteti zgjat jo më shumë se disa muaj, pasi është e pamundur që të ruash imunitet nga ekspozimi ndaj viruseve të tjerë dhe ta humbasësh atë ndaj një virusi të caktuar.
