Ndër akuzat e mitizuara të opozitës ndaj Ramës dhe qeverisë së tij është është ajo e të bërit prej tyre propagandë. Çfarë është propaganda? Pa iu referuar me patjetër fjalorit shqip në kuptimin skolastik të fjalës, propaganda është mospërputhja e të thënës me të bërën. Ose më saktë, e asaj çfarë thuhet e çfarë ndodh në realitet.
Në ligjërimin politik, propaganda është e pashmngshme, pavarësisht nëse je në qeverisje apo opozita. Ajo dallon nga përqindja në ligjërim, pra se sa është e pranishme në të, si dhe nga lloji i servirjes.
Një zhvillim i fundit, ai mbi përmbytjet, na e qartëson në mënyrë ilustrative se cila është dhe cila propagandë. Padyshim që qeveria do avokojë punën e saj, po si e bën këtë. Pos fjalive standarte në ligjërimin avokues, ajo zgjedh të ofrojë grafikë krahasues plot shifra. Prej këtij momenti, ajo e sfidon opozitën në llojin e proipagandës që bën, pasi shkon drejt e në terren me tregues konkret, shifrat dhe përllogaritjet që posedon.
Shembull:
“Ne kemi pasur më shumë se dyfish reshje në janar 2021 sesa në vitin 2010 sipas të gjitha shifrave zyrtare. Edhe në prurjet në basene kanë qenë më shumë se të dyfishuara krahasuar me vitin 2010. Edhe në Kaskada është bërë një punë shumë e mirë.
Në vitin kemi pasur mbi 14 mijë hektarë të përmbytur, krahasuar me 2010. 4000 banese kanë qenë me ujë në oborrë ndërkohë që këtë herë vetëm 145. Diferencë akoma më e madhe është vënë re edhe për shtëpitë me dëme në elektroshtëpiake apo edhe dëmet në bagëti”, tha ministri i Mbrojtjes Niko Peleshi në një dalje për mediat për këtë rast, së bashku me kryeministrin Rama dhe minitren e Bujqësisë Milva Ikonomi.
Kjo e fundi gjithashtu tha: “Janë rehabilituar 40 diga, dhe kjo nuk është e lehtë se përveç se rehabiliton ujin e mbledhur duhet bërë kujdes nga përmbytjet.140 km argjinatura janë përmirësuar siç është në lumin Drin e Buna apo në të tjera zona.
Janë rehabilituar 7 hidrovoret dhe për të tjerat po bëhet një rikonstruktim. Kemi dy hidrovore që u prekën nga tërmeti që u dëmtuan dhe falë programeve të rindërtimit, rehabilitimi i tyre ka qenë i plotë. Ato kanë funksionuar në mënyrë perfekte.
Ne duhet të kemi durim kur ka situata të tilla se duhet të kalojë dy javë që të vlerësohet dëmi, ne kemi 0 dëmtime nga kanalet kulluese, largim të ujërave në kanalet e larta dhe 0 argjinatura të dëmtuara.
Në pikun e reshjeve kishim 88342 ha të përmbytur, ndërsa mbrëmë sipërfaqja aktuale në ujë është 3340 ha dhe pritet që të lirohet. Në 2021 mendohet për të vazhduar investimin, se ka nevojë dhe në buxhetin e shtetit kemi planifikuar një fond 3.9 mld lekë për të ndërhyrë në pikat emergjente”, tha Ikonomi.
Po si iu përgjigj opozita? Në të njëjtën formë, me shifra? As që mendohet. I ra shkurt. Po si? Me propagandë. Me propagandë gjersa nuk ofron asnjë shifër krahasues.
“Edhe sot që flasim qindra, mijëra banorë, mijëra familje janë nën ujë (sa konkretisht?). Shtëpitë e tyre janë në prani të ujit, janë të rrethuara nga uji, janë me mungesa të mëdha të ujit të pijshëm, të ushqimeve, medikamenteve.
Po flas për zona në të gjithë Ultësirën Perëndimore. Ne jemi përpjekur me rrjetin tonë të vullnetarëve të bëjmë gjithçka dhe do të vijojmë ta bëjmë.
E vetmja qeveri në botë që fatkeqësinë e shikon si propagandë është kjo”, ishte një copës e dreklaratës së Bashës. Pra, asnjë shifër, asnjë sfidim në të njëjtën linjë, me të njëjtën metodë. Mjaft që në fund, të konkludojë, siç:
“Po mundohet të bëjë propagandë duke gënjyer, mashtruar” (dhe njëherë: si e vërteton gënjeshtrën dhe mashtrimin, me çfarë treguesish?). “Ka ardhur koha ta largojmë dhe të kemi një qeveri të përgjegjshme dhe një Kryeministër serioz”, e përfundoi Basha porcionin e tij ditor të akuzës.
Pra, një paaftësi apo përtaci, apo më keq, një dorëzim te gjuha e një propagande të rëndomtë, e këto në kushte opozite, ku s’ke asnjë barrë përgjergjësish. Po në qeverisje me një mal përgjegjësish? Ose ose, kur nuk ndërton apo imponon dot një standart moral sfidues në kushte opozite, ahere në emër të çkaje e kërkon pushtetin?
Ngjashëm dhe në raste të tjera.
Rama ofroi në mënyrë të detajuar të gjithë praninë e ekipit të tij qeveritar te “Nusreti”: pse ishin, kush ishin, kush i ftoi, kush pagoi. Dhe opozita, edhe në respekt të inteligjencës së atij që thotë se e ka aleat, popullin, o duhet të ofrojë faktet e saj që e rrëzojnë shpjegimin e Ramës, o mos i dorëzohet tipikisht propagandës, me fraza klishe dhe bajate të vokabularit të stërdëgjuar të akuzave.(Tesheshi)
