Kërkova ishte ndalesa e radhës e drejtuesit politik të Partisë Socialiste, Damian Gjiknuri në kuadër të fushatës për zgjedhjet parlamentare të 25 prillit.
Gjiknuri u njoh me problematikat e zonës ndërsa theksoi se është pikërisht domosdoshmëria për investime në zonat rurale që e ka bëri të përfaqësojë këto zona në zgjedhjet e 25 prillit si një zë i fuqishëm, për të kërkuar vazhdimisht investime për fshatin Kërkovë dhe për të gjitha zonat rurale të qarkut Vlorë.
“Zgjodha të jem pjesë e listës së Partisë Socialiste duke mbuluar zonën tuaj me qëllim për të nxitur më shumë investime, të kem më shumë akses në vendimmarrje dhe kryesorja të zgjidh problemet tuaja kryesore. Të gjitha investimet që po realizohen nga Kryeministri Rama pa diskutim që do të materializohen në të tjera investime, me qëllim që të rritet standardi i jetesës edhe në zonën tuaj. Ju jeni të vetëdijshëm që nëse do të krahasojmë Partinë Demokratike me Partinë Socialiste, PD-ja e ka vërtetuar që jo vetëm nuk do t’ja dijë për zonat rurale por la në mjerim e në harresë edhe qytetin e Vlorës. Që të vijojmë punët e nisura ju duhet të mendoni në radhë të parë për veten dhe për fëmijët tuaj. Mbështetja ndaj Partisë Socialiste është siguri për të ardhmen e fëmijëve tuaj”, u shpreh Gjiknuri.
Gjiknuri foli dhe për projektet infrastrukturore ndërsa tha se “projekti i paraqitur nga nënkryetari i bashkisë për rikualifikim të aksit rrugor që nis nga Bunavia e del në Llakatund duke e lidhur zonën me rrugën nacionale, do të jetë investimi prioritar për mandatin e tretë qeverisës, i cili jo vetëm do të lehtësojë juve në përditshmërinë tuaj, por do t’i japë potencial zhvillimi zonës. Ashtu siç i dhamë zgjidhje problemeve të energjisë elektrike për instalimit të rrjetit elektrik në këtë mandat të tretë do të fokusohemi në rehabilitimin infrastrukturor të zonës. Këto nuk janë premtime, pasi ndryshe nga kundërshtarët tanë politik, ne e kemi faktuar me punë konkrete se gjithçka që premtojmë e bëjmë realitet”.
Gjiknuri tha se në 8 vite të Partisë Demokratike u bënë vetëm 2700 legalizime ndërsa në qeverisjen e Partisë Socialiste janë rreth 16,000 legalizime dhe dokumente pronësie.
