Sekretari i përgjithshëm i Superligës, që ka shkatuat tërmet në futbollin europian, Anas Laghrari, ka mbrojtur projektin e ri, duke këmbëngulur se lojtarët më të mirë në botë do të kenë shansin të luajnë rregullisht kundër njëri-tjetrit. Planet për një turne të ri, që të rivalizojë direkt Ligën e Kampionëve, u zyrtarizuan parmbrëmë, me 12 nga klubet më të mëdha të Europës të përfshira në të. Dhe, pas një dënimi të gjerë që mori në opinion, Laghrari është përpjekur të shpjegojë arsyetimin pas Superliga “i bën njerëzit të ëndërrojnë”:
“Ne duam të krijojmë një platformë për futbollin më të mirë. Një kompeticion që të gjithë duan ta shohin, që i bën njerëzit të ëndërrojnë. Brezat e rinj janë më pak të interesuar për futbollin, ata përqendrohen vetëm në ndeshjet e mëdha. Por, këto përplasje të mëdhenjsh ndodhin rrallë.
Ekziston gjithashtu një zhgënjim midis lojtarëve që duan t’i luajnë këto lojëra të mëdha kundër kolegëve të shkëlqyeshëm. Neymar ëndërroi të luante kundër Lionel Messit. Ai u dëmtua në 1/8 finale të Ligës së Kampionëve 2020-2021 dhe ndoshta nuk do të jetë në gjendje të luajë kurrë më kundër Messit, përsëri. Ne jemi gati të ulemi rreth një tavoline me UEFA, kërkojmë dialog. Në rast mosmarrëveshjeje? Gjithçka mund të fillojë për pesë muaj”.
Cilat klube janë regjistruar? Përveç Barcelonës, La Liga do të përfaqësohet në Superligë nga Real Madridi dhe Atletico Madridi. Nga Serie A janë Juventusi, Interi dhe Milani. Klubet e Premier League përbëjnë gjashtë vendet e fundit, me Manchester United, Manchester City, Arsenal, Liverpool, Chelsea dhe Tottenham të gjithë në bord, por tri skuadra të tjera themeluese pritet të bashkohen në javët e ardhshme. Bayern Munich, Borussia Dortmund dhe Porto e kanë përjashtuar pjesëmarrjen në kompeticion, por Laghrari këmbëngul se askush nuk e ka refuzuar plotësisht propozimin.
