Ka nisur seanca plenare ku kryeministri Edi Rama do të paraqesë programin qeverisës për mandatin e tretë dhe ku pritet të marrë votëbesimin. Kreu i grupit parlamentar të PS-së, Taulant Balla ka thënë se sa i përket komisioneve parlamentare PD duhet të rishikojë deputetët që i ka listuar nga dy herë në komisione në mënyrë që të ruhet një balancë. Sa i përket LSI, Balla tha se që të bëhen pjesë e komisioneve edhe tre deputetët e saj duhet të depozitojnë kërkesat brenda kohës së përcaktuar. “PS është i vetmi grup që është në këtë shumicë dhe të gjithë deputetët e tjerë janë në opozitë. Për të ruajtur këtë balancë do i kërkoja që deri në seancën pasardhëse të ndreqë ndonjë gabim ku ndonjë deputet është vendosur në më shumë se dy komisione. 4 deputetë e LSI apo PSD dhe ata të depozitojnë brenda kohës së përcaktuar nga kryetarja propozimet për tu bërë pjesë në disa komisione”, tha Balla.
Në përgjigje të Ballës ka reaguar edhe deputeti demokrat, Enkelejd Alibeaj i cili u shpreh: “Nuk bëtë gjë tjetër veçse respektuat rregulloren. Një nga kërkesat që kishim dje ishte që programi, i cili është i panjohur për deputetët, por edhe për qytetarët do duhet të kishte dy tre ditë kohë sa publiku dhe deputetët të njiheshin.
Kërkesa jonë për komisionet është paraqitur te ju. Bazuar në rregullore është bërë shpërndarja e deputetëve, nëse keni dëshirë për të kufizuar anëtarësinë e opozitës dhe për t’i hequr numrat opozitës, është çështje që s’ka për të ecur. Deputetët tanë janë këta, janë të shpërndarë në komisione dhe është çështje tjetër nëse ju nuk gjeni gjuhën me njeri tjetrin. Ne kemi paraqitur kërkesën, është e listuar nga ana juaj, zgjidhni hallet me njeri-tjetrin po jo duke i rënë në qafë opozitës.”
