Jurgen Klopp është paraqitur para gazetarëve para super derbit të dielën me Manchester United. Trajneri i Liverpoolit është pyetur për shumë gjëra, në veçanti për krahasimin mes Cristiano Ronaldo dhe Mohamed Salah.
Të dielën nga ora 17:30 do të jetë një sfidë brenda sfidës mes dy prej sulmuesve më të mirë në qarkullim për momentin, Cristiano e Salah.
“Për çfarë krahasoni Ronaldon dhe Salah? Të dy janë lojtarët më të mirë në mbarë botën. Unë do të thosha se këmba e majtë e Ronaldos nuk është e keqe, por ajo e Salah është më e mirë. Cristiano mund të jetë më i mirë në këmbën e djathtë dhe në ajër. Të dy janë shumë të shpejtë, ndihen të uritur për të shënuar gola. Por nuk e kam menduar kurrë këtë temë, është diçka që nuk më intereson”, është shprehur tekniku gjerman.
“Mendoj se ajo që mund të krahasohet 100% është profesionalizmi i të dyve, Mo dhe Cristiano. Ndoshta janë krejt njëjtë. Mo është profesionist i vërtetë. Ai shumë shpesh është i pari që vjen në stërvitje, dhe i fundit që largohet”.
