Një supersfidë e pritshme, e cila prodhon pikë të çmuara për renditjen në prag të ndalesës për angazhimet e ekipeve kombëtare. Torino merr frymë me futbollin për 90 minuta. Është dita e “Derby della Mole”, një ndeshje kurrë banale. “Granatat” e Ivan Juric, në derbin e tyre të parë të kryeqytetit Piemontes, presin Juventusin e Massimiliano Allegrit në “Olimpico Grande Torino”, i freskët nga dy fitoret radhazi në kampionat kundër Spezia dhe Sampdoria, por mbi të gjitha nga suksesi në Ligën e Kampionëve kundër Chelsea.
Dy trajnerët u treguan të kujdesshëm me deklaratat e bëra në konferencat për shtyp. “Në Torino ndiej se qyteti është granata”, – deklaroi Juric, me përgjigjen e shpejtë të Allegrit, disa orë më vonë: “Për ta, si zakonisht, do të jetë ndeshja e jetës”.
Për bardhezinjtë, ndeshja kundër “kushërinjve” është një mundësi e shkëlqyeshme për t’u ngjitur në renditje. Çuditërisht, Torino dhe Juventusi përballen me njëri-tjetrin në derbi me të njëjtat pikë (8). Kjo nuk kishte ndodhur që nga tetori 2015, kur Gian Piero Ventura dhe vetë Allegri ishin në stolat respektivë, në sezonin e dytë të ciklit të parë të trajnerit livornez te Juventusi.
Të dyja skuadrat e filluan me këmbën e gabuar, por shpejt arritën të ndryshojnë kursin. Pasi mori zero pikë në 180 minutat e para midis Atalantës dhe Fiorentinës, Torino filloi një seri me dy fitore dhe dy barazime. Nga ana tjetër, Juve fitoi vetëm një pikë në tri ndeshjet e para, si rezultat i barazimit në Udine dhe humbjeve kundër Empolit e Napolit. Pastaj 1-1 me Milanin dhe fitoret ndaj Spezia e Sampdoria, ndërsa në Ligën e Kampionëve mundi Malmoe dhe Chelsea.
Juric prezanton Torinon me një 3-5-2, ku Lukic, Mandagora dhe Pobega luajnë në mesfushë. Vetëm stol për Linetty, ndërsa përpara do të jetë Brekalo për të mbështetur Sanabria. Aina është përpara Ansaldit në të majtë, ndërsa Singo do të jetë në anën tjetër. Në prapavijë ka vend për mbrojtësin 21-vjeçar çek, David Zima, i cili do të zëvendësojë Djidjin e pezulluar.
Te Juventusi, Kean do të bashkohet me Chiesa në 4-3-1-2 e Allegrit, me Bernardeschi në rolin e mesfushorit-sulmues. Në mesfushë, Bentancur dhe Rabiot do të veprojnë në anët e Manuel Locatelli. Përpara Szczesny, Danilo dhe Alex Sandro do të luajnë në korsitë anësore, me dyshen De Ligt-Chiellini në qendër. Bonucci shkon në stol.
Ja formacionet e mundshme:
TORINO (3-5-2): Milinkovic-Savic; Zima, Bremer, Rodriguez; Singo, Lukic, Mandragora, Pobega, Aina; Brekalo, Sanabria.
JUVENTUS (4-3-1-2): Szczesny; Danilo, De Ligt, Chiellini, Alex Sandro; Bentancur, Locatelli, Rabiot; Bernardeschi; Chiesa, Kean.
