Partizani prej kohësh ka nisur kompleksin e vet në zonën e Tufinës, teksa presidenti Demi ka bërë me dije se skuadra në janar pritet të luajë në stadiumin e ndërtuar atje. Në impiantin e të kuqve mungon vetëm fusha.
Kjo e fundit ka ardhur, por moti i keq në javët e fundit e ka frenuar klubin për të nisur shtrimin e saj në terren.
Siç bëhet me dije nga Partizani, shtrimi i tapetit pritet të nisë në ditët në vijim, i ndihmuar edhe nga koha e mirë, që pritet të zgjasë për rreth një javë.
Duhet thënë se tapeti i stadiumit të Partizanit pritet të jetë një nga më të mirët në vendin tonë dhe jo vetëm.
Drejtuesit kanë vendosur të mos kursehen dhe kanë porositur fushë hibride, me 70% bar natyral dhe 30% bar artificial, që përdoret gjerësisht në klubet e mëdha europiane dhe që është instaluar gjithashtu në “Air Albania”.
Vlera e tij është rreth 300 mijë euro.
