Kryetari i grupit parlamentar të Partisë Socialiste, Taulant Balla i shoqëruar nga një delegacion me deputetë të Kuvendit të Shqipërisë gjatë vizitës në Uashington mori pjesë ne Forumin Parlamentar të Inteligjencës dhe Sigurisë, ku u diskutuan çështjet e rëndësishme të politikave të sigurisë.
Balla është shprehur se, synimi i takimit ishte intensifikimi i marrëdhënieve dhe bashkëpunimit mes Kongresit Amerikan dhe Parlamentit të Shqipërisë.
“Forumi parlamentar i inteligjencës dhe sigurisë, ku u diskutuan disa prej çështjeve më të rëndësishme të politikave të sigurisë. Vijojmë sot takimet me anëtarë të Dhomës së Përfaqësuesve dhe Senatit. Marrëdhëniet shumë të mira mes Shqipërisë dhe SHBA, duhet t’i konkretizojmë edhe në shkëmbime dhe bashkëpunim më të ngushtë mes Kongresit Amerikan dhe Kuvendit të Shqipërisë”, është shprehur Balla për këtë takim.
Balla në SHBA ka zhvilluar dhe një takim të veçantë me Kongresmenin Amerikan David Valandao.
“SHBA janë aleati dhe partneri ynë strategjik. Për ne marrëdhëniet me SHBA janë të rëndësisë parësore në nivelin e partneritetit strategjik dhe përbëjnë themelin e politikës sonë të jashtme. Bashkëpunimi me SHBA është sot në një nivel të shkëlqyer në dobi zhvillimeve demokratike, të forcimit të shtetit ligjor dhe të parimeve të ekonomisë së tregut, në mbështetje të anëtarësimit të Shqipërisë në Bashkimin Evropian, të ruajtjes së stabilitetit, paqes e prosperitetit në rajonin tonë e më gjerë, të luftës kundër terrorizmit”, thekson kreu i Grupit të PS.
Vizita në Uashington ka vijuar dhe me kongresmenen e Nancy Mace, ku në këtë takim është diskutuar u forcimi i marrëdhënieve mes Dhomës së përfaqësuesve të Kongresit të SHBA dhe Kuvendit të Shqipërisë.Vizita e Kreut të Grupit të PS-së, Taulant Balla ka kulmuar me takimin në DASH, ku u prit nga Drejtori i Zyrës për Çështjet e Europës Qendrore dhe Juglindore, Marrin McDowell.
“Uashington. Në Departamentin e Shtetit u mirëpritëm nga Drejtori i Zyrës për Çështjet e Evropës Qendrore dhe Jugore Martin McDowell. Shtetet e Bashkuara të Amerikës përmes Departamentit të Shtetit mbështesin fillimin e bisedimeve për anëtarësim të Shqipërisë me Bashkimin Evropian. E falenderova zotin McDowell për përpjekjet e tyre diplomatike me vendet e anëtare të BE për mbajtjen e Konferencës së Parë Ndëqeveritare BE-Shqipëri sa më parë. Falë mbështetjes së pazëvendësueshme të SHBA dhe BE, Shqipëria ka miratuar dhe po zbaton një reformë të thellë të sistemit të drejtësisë, e cila po garanton çdo ditë e më shumë një sistem drejtësie efikas në shërbim të barazisë para ligjit, në krijimin e klimës dhe garancive për investimet e huaja dhe ndëshkimit të korrupsionit dhe eliminimin e pandëshkueshmerisë. Sikurse është bërë publike, Presidenti Biden e ka shpallur luftën kundër korrupsionit si një çështje themelore të interesave të sigurisë kombëtare”, thekson Balla.
“Administrata Biden-Harris shpalli pak ditë më parë, të parën Strategji të SHBA në Luftën kundër Korrupsionit, e cila përfshin marrjen e masave shtesë dhe të menjëhershme për të reduktuar aftësinë e aktorëve të korruptuar të përdorin sistemet financiare të SHBA dhe ato ndërkombëtare, të fshehin asetet dhe pastrojnë të ardhurat nga aktet korruptive. Shqipëria ka dëshmuar gjithmonë, si një partner i besueshëm dhe anëtar i NATO-s, të jetë përkrah SHBA dhe kjo u rikonfirmua edhe një herë në rastin e mikpritjes dhe strehimit në Shqipëri të afganëve përgjatë këtij viti, jeta e të cilëve rrezikohej nga rikthimi i regjimit të talebanëve”, ka theksuar Balla për këtë takim të nivelit të lartë.
Në këtë vizitë intensive Balla dhe delegacioni shqiptar janë takuar dhe me drejtorin e NDI, Robert Benjamin.
“Në takimin me Drejtorin Rajonal të Programeve të NDI për Europën Qëndrore dhe Jugore Robert Benjamin dhe drejtueset e programeve diskutuam mbi bashkëpunimin e ngushtë dhe të shkëlqyer me NDI Albania – National Democratic Institute. Mirënjohje NDI për mbështetjen që po i jep Kuvendit të Shqipërisë në ngritjen e Institutit të Studimeve Parlamentare”, tha Balla.
