Kryeministri i Republikës, Albin Kurti ka deklaruar se edhe formalisht u hap rruga për krijimin e Gjykatës Komerciale. Përmes një postimi në llogarinë e tij në Facebook, ai tha se ky ishte zotim zgjedhor, prioritet në programin qeveritar, që sot e mori epilogun nga Kuvendi i Republikës.
“I falenderoj të gjithë deputetët për votimin dhe diskutimet”, ka shkruar Kurti.
“Shumë gjatë sektori privat është ballafaquar me sfida që kanë frenuar bizneset e tyre për shkak të mungesës së efikasitetit gjyqësor, procedurave të stërzgjatura për zgjidhjen e rasteve, ekspertizave profesionalisht jo të kënaqshme apo numrit të vogël të gjyqtarëve”.
“Vetëm për tri vite (2018, 2019 dhe 2020), në Departamentin për Çështje Ekonomike janë hapur 2260 konteste mes bizneseve, nga të cilat 15 raste kanë vlerë mbi 1 milion euro secila”, ka treguar kryeministri. Ligji për Gjykatën Komerciale krijon mundësi të mjaftueshme për rritjen e efikasitetit në zgjidhjen e kontesteve tregtare, tregon Kurti, “me qëllim që të drejtat e bizneseve të fituara nga zgjidhja e mosmarrëveshjeve tregtare dhe administrative të realizohen pa vonesa, duke lehtësuar kësisoj shfrytëzimin e kapitalit”.
“Ligji siguron lirinë e sipërmarrjes, barazinë e palëve, të drejtën e pronës dhe zbatimin e kontratave, në përputhje me kushtetutën dhe ligjet e vendit. Po ashtu, ndërton besimin e investitorëve, duke përfshirë mërgatën tonë, dhe i hap rrugë zhvillimit të qëndrueshëm dhe mirëqenies së qytetarëve të Republikës”. Departamenti Ekonomik i Gjykatës Themelore në Prishtinë ka operuar me kapacitete të kufizuara, me ç ‘rast mesatarja e zgjidhjes së vetëm një rasti të natyrës ekonomike merrte 4 deri në 5 vite kohë.
“Themelimi i Gjykatës Komerciale do të përmirësoj gjendjen përmes aktgjykimeve meritore për zgjidhje përfundimtare të rasteve nga gjyqtarët, numri i të cilëve do të rritet konsiderueshëm, nga vetëm 5 sa kanë qenë deri tash. Mbi 3.000 raste qysh në fillim do të jenë subjekt shqyrtimi i kësaj Gjykate, që do të ketë juridiksion edhe për rastet përmbarimore, duke zgjidhur afërsisht 500 raste të kësaj natyre në vit”, ka shpjeguar më tej Kryeministri Kurti.
Kryeministri vlerëson se ky ligj do të ketë ndikim ekonomik tejet pozitiv në vendin tonë. Kjo, duke lehtësuar tërheqjen e investimeve të jashtme, duke e bërë Kosovën shtet më kredibil, serioz dhe të përkushtuar për drejtësi dhe të drejtën, drejt zhvillimit ekonomik.
“Ligji për Gjykatën Komerciale i shërben shtetit të së drejtës si parakusht të zhvillimit ekonomik”, ka përfunduar Kryeministri Albin Kurti. Me 74 vota për, asnjë kundër dhe asnjë abstenim, deputetët e Republikës së Kosovës, në seancën e së premtes votuan projektligjin për Gjykatën Komerciale.
