Drejtuesi Politik i Partisë Socialiste për Qarkun e Fierit, Taulant Balla inspektoi sot punimet që po kryhen për asfaltimin e ‘Shëtitores së Palmave’ në Lushnje.
Në fjalën e tij Balla iu përgjigj interesit të gazetarëve lidhur me zgjedhjet e pjesshme vendore të 6 marsit, dhe kandidatit që do i besojë PS në këtë proces.
Balla tha se, nuk po presin emrin e opozitës, për të publikuar kandidaturën e tyre për bashkinë e Lushnjes, ndërsa shtoi se po kryhen konsultime për të nxjerr kandidatin më të mirë.
Në një prononcim për mediet Balla tha se, “kemi detajuar në mënyrë të shpejtë një projekt të përbashkët mes bashkisë dhe Fondit Shqiptarë të Zhvillimit për të rregulluar një problematikë të hasur ndër vite në një nga bulevardet kryesore të qytetit të Lushnjës. Unë jam shumë i kënaqur që punimet po ecin me cilësi. Sot do të fillojë shtrimi i shtresës së parë të asfaltit dhe brenda projektit është i gjithë vijëzimi dhe sinjalistika horizontale e vertikale me qëllim që ky bulevard të plotësojë të gjitha kriteret e nevojshme të një qyteti Evropian sikurse ne duam ta kemi në Lushnje”.
“Ne kemi biseduar me kryetarin e bashkisë edhe për projekte të tjera si ai i përroit apo të infrastrukturës së këtij qyteti. Lushnja është qyteti i shtatë më i madh në Shqipëri dhe si i tillë vëmendja e qeverisë shqiptarë do të vazhdojë të jetë edhe më e madhe se sa ka qenë në vitet e kaluara, me projekte të rëndësishme. Mos harrojmë që jemi duke investuar edhe projekte të rëndësishme të kanalizimeve dhe ujësjellësit si dhe rrugë të tjera në bashkëpunim me Fondin e Zhvillimit, të cilat thuajse janë në prag përfundimi”, theksoi Balla.
I pyetur nëse PS po pret emrin e kandidatit të opozitës për të nxjerrë emrin e kandidatit për bashkinë e Lushnjës, Balla tha se, “jo, ne nuk jemi në garë me opozitën. Ne do të qeverisim në Lushnje jo vetëm në këtë pjesë të mbetur të mandatit , por do të vazhdojmë të qeverisim në qeverisjen vendore të Lushnjës edhe përtej mandatit që fillon në 2023. Gjithashtu ajo që ne kemi bërë unë mendoj që është mëse normale sepse kur ke një numër të madh vlerash kandidatësh, natyrshëm duhet të konsultohesh me të gjithë për të kuptuar se cili është personi që do ti besojmë të çojë përpara këto projekte. Ajo që është e rëndësishme është që e gjithë partia Socialiste e Lushnjës është e bashkuar në funksion të një fitoreje që do të jetë ndër më të mëdhatë që ka hasur partia socialiste”.
I pyetur nëse rrjetet sociale e dhanë rezultatin e tyre, Balla u shpreh se, “këtë unë nuk e di sepse nuk para besoj në këtë pjesë. Ajo që unë besoj janë qytetarët e Lushnjës dhe ata janë të pagabueshëm”.
