Sekretari i Përgjithshëm i NATO-s, Jens Stoltenberg, ka deklaruar se retorika e presidentit, Vladimir Putin, është e “rrezikshme”. Kjo deklaratë e tij erdhi pasi Putin njoftoi gatishmërinë e lartë e forcave bërthamore. Për Stoltenberg ky vendim i presidentit rus është shenjë papërgjegjshmërie.
Putin, i ka kërkuar Ushtrisë së tij, që të vendosi forcat e “Parandalimit Bërthamor” në gatishmëri të lartë. Kjo si përgjigje të “deklaratave agresive” të vendeve të NATO-s. Ky urdhër është njoftuar nga agjencia ruse e lajmeve “TASS”. Sipas saj, Putin ka diskutuar me ministrin e Mbrojtjes, Sergei Shoigu dhe shefin e Shtabit të Përgjithshëm të Forcave të Armatosura të Rusisë, Valery Gerasimov.
“Zyrtarët e lartë të vendeve kryesore të NATO-s lejojnë gjithashtu deklarata agresive kundër vendit tonë, prandaj urdhëroj, ministrin e Mbrojtjes dhe Shefin e Shtabit të Përgjithshëm të Forcave të Armatosura Ruse të transferojnë forcat e ‘Parandalimit’e në atë të detyrës luftarake”, tha Putin në deklaratën.
Nuk dihet ende se çfarë përfshin “mënyra e veçantë e detyrës luftarake”.
